"Rusiya Ukraynada xüsusi hərbi əməliyyatın məqsədlərinə nail olacaq..." - Nikolay Patruşev
"Ukraynada nasizmin yayılması, bioloji laboratoriyaların fəaliyyət göstərməsi, Kiyev rejimi tərəfindən nüvə silahının yaradılması və NATO-ya daxil olması planlarının bəyan edilməsi təkcə Rusiya üçün deyil, bütün dünya üçün təhlükə törədib".
Rusiya dünyanı xilas edib?
Patruşev növbəti dəfə "xüsusi əməliyyat"ın məqsədlərini sadalayıb. Kiyevə Qərb silahının tədarükünə rəğmən, Rusiya Ukraynada "xüsusi hərbi əməliyyat"ın məqsədlərinə nail olacaq.
Bunu Rusiya Təhlükəsizlik Şurasının katibi Nikolay Patruşev Xabarovskda milli təhlükəsizlik məsələləri üzrə müşavirədə bəyan edib.
Məlumatı Rusiyanın "RİA Novosti" agentliyi yayıb.
O, xatırladıb ki, Rusiya "xüsusi hərbi əməlyyat"a ona görə başlayıb ki, "Ukraynada nasizmin yayılması, onun ərazisində ABŞ-ın hərbi-bioloji proqramı çərçivəsində bioloji laboratoriyaların fəaliyyət göstərməsi, habelə Kiyev hakimiyyəti tərəfindən nüvə silahının yaradılması və NATO-ya daxil olması planlarının bəyan edilməsi" təkcə Rusiya üçün deyil, bütün dünya üçün əhəmiyyətli təhlükələr yaradıb.
Patruşevin sadaladığı kimi, buna uyğun olaraq, "xüsusi əməlyyat"ın məqsədləri "insanları Ukraynanın neonasist rejimi tərəfindən soyqırımdan müdafiəsi, Ukrayna ərazisinin demilitarizasiya və denasifikasiyası, gerçəkdən onun neytral statusuna nail olunması və bunun konstitusiyada təsbit olunmasıdır".
"ABŞ və Qərb tərəfindən Ukraynaya hərbi yardım göstərilməsinə, ölümsaçan silah tədarükünün get-gedə artmasına rəğmən, göstərilən məqsədlərə nail olacağıq", - məlumatda belə deyilir.
