Almaniya "Fuchs" zirehli transportyorunu Ukraynaya verməkdən niyə imtina etdi?

Almaniyanın müdafiə naziri Kristina Lambrext Ukraynaya “Fuchs” zirehli transportyorlarını verməyəcəklərini bəyan edib.

Bu barədə Almaniyanın “Tagesschau” xəbər xidməti məlumat yayıb.

"Biz Ukraynanı mümkün olan hər şeylə dəstəkləyirik. Amma biz həm də Almaniyanın özünü müdafiə qabiliyyətini də qorumalıyıq", - deyə Almaniya Müdafiə nazirliyinin rəhbəri müxalifətin Ukraynaya hərbi texnika verilməməsi ilə bağlı tənqidlərini şərh edərkən bildirib.

Müdafiə naziri “CDU/CSU” (Xristian-demokratlar-red.) müxalifət blokunun tələbini “quldurluq” adlandırıb.

“Xüsusən bizim dövrümüzdə “Bundesver”i (Almaniya ordusu) talamaq istəmək və baş müfəttişin hərbi məsləhətlərinə məhəl qoymamaq əsl məsuliyyətsizlikdir”, - deyə K.Lambrext bildirib.

Xatırladaq ki, Almaniya Silahlı Qüvvələrinin baş müfəttişi vəzifəsini icra edən general Eberhard Zorn “Bundesver”in öz ehtiyatlarının az olması səbəbindən Ukraynaya texnika verə bilmədiyini söyləyib.

Qeyd edək ki, Almaniya ordusunun inventarında 800-dən çox müxtəlif modifikasiyalı “Fuchs” zirehli transportyoru mövcuddur.