ABŞ və Qərb üçün Çin probleminin miqyası...
ABŞ Federal Təhlükəsizlik Bürosunun (FTB) rəhbəri Böyük Britaniyanın daxili kəşfiyyat (Mİ5) rəhbəri ilə birgə bəyanatla çıxış edərək, işgüzar dünyanı Çinin xüsusi xidmət orqanlarının fəallığının kəskin surətdə artması barədə xəbərdarlıq edib.
Bu bəyanat iyulun 7-də Mİ5-in Londondakı mənzil-qərargahında səsləndirilib.
FTB-nin direktoru Kristofer Rey və Mİ5-in direktoru Ken Makkallum Çinin son aylar kəşfiyyat fəallığının xeyli artması barədə həmrəy olduqlarını bildirib.
Bəyanatda deyilir ki, Çin texnologiyaların oğurlanması yolu ilə dünya bazarında özünün rəqabətqabiliyyətini təmin etmək niyyətindədir.
"Biz görürük ki, məhz Çin bizim uzunmüddətli iqtisadi və milli təhlükəsizliyimizə ən çox təhlükə törədir, mən "bizim" deyəndə hər iki ölkəmizi, habelə Avropada və başqa ölkələrdə müttəfiqlərimizi nəzərdə tuturam", - Kristofer Rey belə deyib.
O, əlavə edib ki, Çinin fəallığı texnologiyaların oğurlanması ilə məhdudlaşmır. Çin Qərb ölkələrinin həyatının müxtəlif tərəflərinə təsir vasitələrinə gizli surətdə əl qoymaq üçün səylər göstərir.
Ken Makkallum bununla razılaşaraq əlavə edib ki, hazırda Mİ5 Çinlə bağlı dörd il əvvəlkinə nisbətən 7 dəfə çox tədqiqat aparır və gələcəkdə belə tədqiqatların sayını artırmağı planlaşdırır.
"Bu gün ilk dəfə olaraq FTB və Mİ5 vahid açıq platformada çıxış edir, - Makkallum xatırladıb. - Və biz bunu bütün maraqlı tərəflərə Çin probleminin miqyası barədə ən dəqiq siqnal göndərmək üçün edirik".
Qeyd etmək lazımdır ki, ictimai rəyi öyrənən mərkəzlər (məsələn, Çikaqodakı GSS mərkəzi) Çin dilini bilən işçilər üçün çoxsaylı vakant yerlər elan edib.
