"Müharibənin fırlanan çarxını bizim dəstə işə salıb, düyməni biz basmışıq..."

Rusiyalı-ukraynalı prodüser Aleksandr Rodnyanski güman edir ki, Rusiyanın Ukraynaya qarşı müharibəsində, Putinlə yanaşı, Federal Təhlükəsizlik Xidməti orqanlarının sabiq əməkdaşı, "Novorossiya" ictimai hərəkatın rəhbəri, hərbi icmalçı İqor Strelkov (Qirkin) günahkardır.

Bu barədə o, özünün "İnstagram" səhifəsində yazıb.

"Biz bu cinayətkar müharibənin günahkarlarını xatırlayanda, adətən, Putinin özünü, onun dostlarını, generallarını və ya təbliğatçılarını göstəririk. Amma bu müharibənin bir konkret günahkarı var. Bu adam özü etiraf edib ki, "müharibəni başlamaq düyməsinə özü basıb". Bu, FTX-nın ehtiyatda olan zabiti İqor Strelkovdur. O, həm də Qirkindir.

Məhz onun silahlı dəstəsi sərhədi keçərək Ukraynanın Slavyansk şəhərini ələ keçirib, bundan sonra döyüş əməliyyatları başlayıb. Məhz Strelkov "DXR" adlı quldur qurumun ilk "müdafiə naziri" olub", - Rodnyanski yazıb.

Prodüser qeyd edib ki, Sfrelkov hələ 2014-cü ildə bəyan edib ki, əgər onun dəstəsi sərhədi keçməsəydi, Donbasdakı hadisələr qonşu dövlətlər arasında tammiqyaslı müharibəyə çevrilməzdi.

"Onlarla qətlə yetirilənlər, yananlar, həbs edilənlər olacaqdı. Bununla da hər şey bitəcəkdi. Amma beləcə indiyədək müharibənin fırlanan çarxını  bizim dəstə işə salıb", - Rodnyanski Qirkinin sözlərindən iqtibas gətirib.

O, qeyd edib ki, Strelkov müntəzəm olaraq döyüş əməliyyarları haqqında yazır və bu, "müharibəyə nifrət edən, onun məqsədlərini bölüşməyən, onu cinayətkar hesab edənlər üçün son dərəcə nikbin mütaliədir".

Rodnyanskinin müşahidələrinə görə, hazırda Stelkovun  tamamilə məğlub əhval-ruhiyyədədir, o, açıq şəkildə Rusiya müdafiə nazirini, onun "başdanxarab generallarını" tənqid edir. Hər şeylə yanaşı, müxalifətçi Rusiya ordusunun saysız-hesabsız səhvlərindən yazır.

"Strelkovun məlumatlarını təbliğata inananların və "hər şey plan üzrə gedir" iddia edənlərin oxuması məsləhətdir. Ola bilsin, müharibəni "qızışdıranın" fikri onlara təsir etsin", - Rodnyanski yazıb.

Prodüser öz materialına Rusiya raketlərinin zərbələrindən sonra Ukraynanın Çasov Yar şəhərinin dağıntılarını əks etdirən fotoşəkillərini əlavə edib.

Bu günə olan məlumata görə, çoxmərtəbəli binanın dağıntıları altından Ukraynanın 26 dinc sakininin cəsədləri çıxarılıb.