"Bir 30 il də gözləməyə səbrimiz yoxdur" - Türkiyənin Müdafiə Naziri

“Bir 30 il də gözləməyə səbrimiz yoxdur. Həll mexanizmlərinin beynəlxalq miqyasda etimad qazanması üçün fürsət yaranıb”.

Azsiyasət.com Türkiyə mətbuatına istinadən xəbər verir ki, bunu Türkiyənin Milli Müdafiə naziri Hulusi Akar deyib.

O bildirib ki, Azərbaycan torpaqlarının işğalına səssiz qalanlar atəşkəs çağırışı yerinə Ermənistanı Dağlıq Qarabağı tərk etməyə məcbur etməlidirlər.

“Qarabağı işğal edən və mülki əhaliyə qarşı qırğınlar törədən Ermənistanın qarşısında səssiz qalanların nümayiş etdirdikləri davranış tam bir ikiüzlülükdür”, - deyə nazir vurğulayıb.

Hulusi Akar bildirib ki, Ermənistan terror təşkilatları ilə əməkdaşlığı dayandırmalı və Azərbaycanın işğal olunmuş ərazilərindən dərhal çıxmalıdır.

Dağlıq Qarabağ probleminin dərhal həll olunmasının vacibliyini vurğulayan nazir bildirib:
“Hər zaman və hər yerdə qürurla ifadə etdiyimiz kimi, Azərbaycanın dərdi bizim dərdimiz, sevinci bizim sevincimizdir. Can qardaşlarımızın yanında olduq, bundan sonra da haqlı mübarizəsində sonadək Azərbaycanın yanında olacağıq”.