"İtkin" səfir Ukraynada həbsdə olan Misir Qasımlıdan danışdı - "İndi niyə həngamə qopub?"

1 ildir Ukraynada həbsdə saxlanılan Vətən Müharibəsi iştirakçısı Misir Qasımlının bu gün keçirilməsi nəzərdə tutulan məhkəməsi təxirə salınıb.

Bu barədə pravda.az-a açıqlamasında Azərbaycanın Ukraynadakı səfiri Elmira Axundova deyib.

“Bu gün Misir Qasımlının 13:30-da məhkəməsi olmalı idi, lakin təxirə salınıb. Sabah 10:30-da keçiriləcək. Konsulumuz da ordadır. Səfirliyimizin işçiləri də hamısı məhkəmədə iştirak edəcəklər. Narahatlığa dəyməz. Çünki lap əvvəldən tapşırmışam, xahiş etmişəm. Misiri də tanıyırıq. Artıq 1 ildən çoxdur, həbsdədir. Əlbəttə, onun məhkəməsi artıq başa çatmalıdır. Ona görə də tapşırmışam ki, konsullarımız məhkəmədə iştirak etsinlər”.

Elmira Axundova Misir Qasımlı ilə maraqlanmaması, səfirliyin M.Qasımlının ailə üzvlərinin zənglərinə cavab verməməsi barədə yayılan məlumatlara da münasibət bildirib:

“Misir Qasımlı dünən həbs edilməyib... Yazıq artıq 1 ildən çoxdur, ordadır. İndi niyə həngamə qopub? Şikayət etsinlər, burdayam. Bakıda işləyirəm. Burda da işlər çoxdur. 4 işçim Ukraynadadır. Onlar bu məsələ ilə məşğuldurlar, cavab verirlər. Mən axı burdayam, necə cavab verə bilərəm? Nə lazımdırsa edirik, məktublar da göndərildi. Məhkəmələr də olanda əməkdaşlarımız, konsulumuz iştirak edəcəklər”.