"Rusiya ərazisini vurmayacağımızı vəd etmişik" - Aleksey Reznikov

"Bu, həqiqətdir, mən bunu gizlətmirəm. Biz öhdəlik götürmüşük ki, yüksək dəqiqlikli silahlardan Rusiya Federasiyasındakı obyektləri vurmaq üçün istifadə etməyəcəyik”.

Bunu Ukraynanın Müdafiə naziri Aleksey Reznikov BBC-yə müsahibəsində bildirib. 

Reznikov hətta bununla bağlı Qərbə yazılı zəmanət verdiklərini də qeyd edib: “Biz bunu sübut etmişik və hətta mən şəxsən Pentaqon rəhbərinə məktubumda bildirmişəm ki, Amerika silahlarından düşmənin qarşısının alınması və torpaqlarımızın işğaldan azad edilməsi üçün yalnız Ukrayna ərazisində istifadə edəcəyik”. 

Müdafiə nazirinin dediklərindən belə aydın olub ki, Ukrayna Krım ərazisini də Qərbin verdiyi yüksək dəqiqlikli silahlarla vurmayacağına dair öhdəlik götürüb: “Bizim hələ işğal olunmuş ərazilərimizdə məhv edəcəyimiz kifayət qədər strateji hərbi obyektlər var”. 

Reznikov müsahibəsində Rusiyanın canlı qüvvə itkisinə də toxunub və qeyd edib ki, say baxımından bu itkilər Rusiyanın itkilərindən dəfələrlə azdır. Bununla yanaşı, nazir qeyd edib ki, Ukrayna Ordusu ən çox may ayında canlı qüvvə sarıdan itkilər verib: “O vaxt xüsusilə Donbass istiqamətində düşmənin üstünlüyü çox güclü idi. Onlar bir saat ərzində 1000-ə yaxın artilleriya mərmisindən istifadə edirdilər. Bu, misilsiz təzyiq idi və bizim onlara cavab verəcək imkanımız yox idi. Bizim o qədər mərmimiz yox idi. Mayda doğrudan da gün ərzində 100-ə yaxın döyüşçümüz həlak olur, 300-400 nəfər yaralanırdı”.

Nazir bildirib ki, yalnız Ukrayna Ordusuna 155 mm-lik artilleriya qurğuları, eləcə də Fransa və Almaniya istehsallı haubitsalar və ən nəhayət, “HİMARS”-lar çatdırılandan sonra döyüş meydanında vəziyyət dəyişib və itkilər xeyli azalıb: “Biz yalnız onların hərbi anbarlarına və idarəetmə məntəqələrinə çox dəqiq zərbələr endirəndə döyüş mənzərəsi əhəmiyyətli şəkildə dəyişir”.

Nazir onu da əlavə edib ki, hazırda Qərb tərəfdaşlarından sözügedən silahların yeni partiyaları daxil olmaqdadır.

Qeyd edək ki, Reznikovun da dediyi kimi, “HİMARS” tipli uzun mənzilli və yüksək dəqiqlikli silahlar gerçəkdən də döyüş zonasında mənzərəni xeyli dəyişib və Rusiya tərəfinin bununla bağlı təşviş içərisində olduğu açıq sezilir. Ən əsası isə odur ki, Rusiyanın bu silahlara qarşı qoya biləcək texnologiyası, silahı yoxdur. Hətta bir çox ekspertlər hesab edirlər ki, bundan sonra dünyada Rusiyanın “S-300” və “S-400” zenit-raket komplekslərini alan olmayacaq.