İran Urmiya gölünü niyə xilas etmir? - "Əmr parlamentdən gəlir..."

İranda tamamilə quruma təhlükəsi ilə qarşı-qarşıya qalan Urmiya gölünün xilas edilməsi üçün lazımi addımları atmamaqda günahlandırılan hökumətə qarşı etiraz aksiyaları davam etməkdədir. 

Urmiya gölünün qurumasına laqeyid yanaşan hokumətə etiraz olaraq yüzlərlə insan Urmiya şəhərində aksiya keçirib.

Aksiya iştirakçıları “Urmiya gölü susuzdur!”, “Parlament Urmiya gölünün öldürülməsini əmr edir!” şüarları səsləndiriblər.

Qeyd edək ki, 2003-cü ildən su səviyyəsi azalmağa başlayan Urmiya gölü 2013-cü ildə tamamilə quruma təhlükəsi ilə üzləşib. Hazırda gölün 95 faizinin quruduğu bildirilir.

Dünyanın ən böyük duzlu göllərindən biri olan Urmiya gölünün quruması ətraf ərazilərdə yaşayan və kənd təsərrüfatı və heyvandarlıqla məşğul olan azərbaycanlıların həyatına mənfi təsir edir.