"Rusiya-Azərbaycan qarşıdurması yaratmaq istəyən qüvvələr var" - Pənah Hüseyn
Son 2 gün ərzində Qarabağdan ard-arda narahat doğuran xəbərlər gəlməkdədir. Belə ki, Rusiya sülhməramlı kontingentinin hərbçiləri ötən gün Azərbaycan ərazilərinə qanunsuz silah-sursat keçirməyə cəhd göstərsələr də, Azərbaycan hərbçilərinin ayıq-sayıqlığı nəticəsində bu təxribatın qarşısı alınıb. Lakin buna baxmayaraq, sülhməramlıların təxribatlarının yenə də ardı-arası kəsilmir. Onların Laçının Qaraqaxa kəndində talançılıqla məşğul olmalarını göstərən kadrlarla yanaşı separatçı “müdafiə ordusu”nun Xocalı istiqamətində sülhməramlıların gözü qarşısında səngər qazması ərazidəki hərbi eskalasiya riskini artırır.
Azərbaycan Xalq Partiyasının (AXP) rəhbəri, sabiq Baş nazir Pənah Hüseyn də eyni rəyi bölüşüb.
Son günlər Rusiya sülhməramlılarının müvəqqəti nəzarəti altında olan ərazilərdə baş verən hadisələrə münasibət bildirən eks Baş nazir deyib ki, bu məsələ çoxdandır müzakirə olunur və bütün təfərrütalar məlumdur:
“Bildiyiniz kimi, bu yaxınlarda Azərbaycanın siyasi rəhbərliyi açıqladı ki, Ermənistan silahlı qüvvələri və o cümlədən qeyri-qanuni silahlı birləşmələr Rusiya sülhməramlıların müvəqqəti məsuliyyət zonasında iyul ayının ortalarına qədər çəkilməliydi.
Bundan əlavə, 10 noyabr tarixli bəyannaməyə görə də Laçın şəhərindən kənar keçməklə Xankəndini Ermənistanla birləşdirən yeni marşrut təyin olunmalıdır. O da Azərbaycan tərəfindən artıq hazırdır, lakin Ermənistan tərəfi 8 km-lik öz ərazisindən keçəcək yolun tikintisini ləngidir.
Ona görə də hazırda “sülhməramlılar” və terroçu qruplar tərəfindən aparılan bütün bu işlərin mahiyyəti həmin razılaşmaları pozmaqdır və Azərbaycan tərəfi də bu məsələdə olanı deyir. Azərbaycanın siyasi rəhbərliyi bu məsələdə prinsipial mövqe qoyub və əgər bu məsələ ciddi bir şəkildə pozularsa, yeni bir situasiya yaranar və terroçulara qarşı antiterror əməliyyatının aparılması və Rusiya sülhməramlılarının bu zonada qalıb-qalmaması məsələsi müzakirəyə çıxarılmalıdır. Məsələnin mahiyyəti bundan ibarətdir”.
“O ki qaldı Xocalıda separatçıların slühməramlıların gözü qarşısında səngər qazmasına, bu, həmin o təxribatçı addımlar silsiləsindən biridir. Şübhəsiz ki, bu xarakterli hər hansı bir məsələlərin Azərbaycan tərəfindən qarşısı alınmalıdır.
Həmçinin, qarşı tərəfdə bu gərginliyi yaradıb münaqişədə Rusiya-Azərbaycan qarşıdurması yaratmaq istəyən qüvvələr də var. Yəqin ki, bu məsələlər də əldə olunan faktlar əsasında götür-qoy edilir.
Amma istənilən halda, hətta Rusiya ilə gərginlik çıxması halında belə, əldə olan hüquqi sənədlər və müqavilələr baxımından Azərbaycanın silahlı qüvvələrdən istifadə etməklə addımlar atması qanunidir”, - deyə müsahibimiz yekunlaşdırıb.
