"Rusiyanın Ukraynada kifayət qədər ciddi yara alması hamımızın maraqlarına uyğundur" - Partiya sədri

“Rusiya Ukraynada qələbə çalarsa, bu, Azərbaycan üçün çoxlu problemlər doğura bilər”. 

Bu sözləri Demokrat.az-a açıqlamasında Azərbaycan Naminə Alyans Partiyasının sədri Abutalıb Səmədov deyib. Partiya sədri vurğulayıb ki, bir müddət əvvəl Rusiya prezidenti gənc sahibkarlarla görüşündə bu barədə kifayət qədər açıq danışdı:

“Rusiya prezidenti Vladimir Putin çıxışında I Pyotru misal gətirdi. O, çıxışında belə bir iddia irəli sürdü ki, I Pyotr Rusiya torpaqlarını birləşdirib və vahid dövlət halında toparlamağa çalışıb. Yəni, o, özgələrinin torpağını işğal etməyib, sadəcə Rusiya torpaqlarını toparlamağa çalışıb iddiasını irəli sürdü və davam etdi ki, bizim də payımıza bu düşüb. Yəni, biz də Rusiya torpaqlarını toparlamağa çalışırıq. Hələlik Rusiya Ukraynada müharibə etməklə, Ukraynanın müəyyən ərazilərini Rusiyanın nəzarətinə keçirtməyə çalışırlar”. 

A.Səmədov hesab edir ki, bu kampaniya uğurla başa çatsa, təkcə Azərbaycan üçün deyil, digər keçmiş ittifaq respublikaları üçün də ciddi problemlər yarana bilər:

“Çünki o torpaqları da Rusiya özünün torpaqları hesab edir. Ona görə də, biz təbiidir ki, Ukraynanın biz bu müharibədə qalib gəlməsinə arzulayırırq. Bu qələbə həm bizim, həm də digər ittifaq respublikalarının maraqlarına xidmət edir. Ən azından Ukrayna qalib gəlməsə də, heç olmasa Rusiyanın bu müharibədə kifayət qədər ciddi yara alması hamımızın maraqlarına uyğundur. Rusiya bu müharibədə həddindən artıq zəifləmiş vəziyyətdə çıxmalıdır ki, nə Azərbaycana qarşı, nə Qazaxıstana, nə Özbəkistana, nə də digər  keçmiş ittifaq respublikalarına qarşı hər hansı iddia ilə çıxış etməsin”. 

“Bunun üçün də Qərbin Ukraynaya dəstəyi artmalıdır, Qərb Ukraynaya daha ciddi dəstək göstərməlidir. Heç olmasa, vəd verdiklərini vaxtında çatdırmalıdır. Vaxtında çatdırmalıdır ki, Ukrayna da elan etdiyi kimi əks hücuma keçib işğal olunmuş torpaqlarını geri qaytara bilsin. Bu gün Ukrayna təkcə özü üçün deyil, regiondakı bütün dövlətlərin müstəqilliyi üçün vuruşur. Bu səbəbdən Rusiyanın müttəfiqi olan dövlətlər də Ukraynaya olan rəğbətlərini qətiyyən gizlətmirlər”.