"Sepah" 3 ölkənin sərhədində hərbi təlim keçirdi

İran İslam İnqilabı Keşikçiləri Korpusu (İİKK - "Sepah") ölkənin qərbində təlimlər keçirib.

"Fars News" xəbər verir ki, bunu İİKK-nin komandanı general-mayor Hüseyn Səlami bildirib.

Onun sözlərinə görə, 9-cu kəşfiyyat təlimində "Sepah"ın ən qabaqcıl və müasir kəşfiyyat vasitələri, müasir kəşfiyyat üsulları və kəşfiyyat təcrübələri istifadə olunub.

"Bu təlim Qərbi Azərbaycan, Kürdüstan, Mərkəzi, Luristan və Zəncan əyalətlərində keçirilib. Əsas məqsədi hazırlıq səviyyəsini artırmaqdır. Kəşfiyyat və təhlükəsizlik qüvvələrin hazırlığını qiymətləndirmək və mövcud çatışmazlıqları aradan qaldırmaq, düşmənin kəşfiyyat xidmətləri ilə mübarizədə irəliləyişləri artırmaq və döyüş hazırlığının səviyyəsini yüksəltməkdən ibarət idi", - deyə Hüseyn Səlami hərbi təlimin prioritetlərini açıqlayıb. 

O, qeyd edib ki, təlimdə real şərtlər simulyasiya edilib və ən qabaqcıl və müasir şərtlərə uyğunlaşdırılıb. 

İİKK komandanı "Həmzə Seyyidüş-Şəhid" düşərgəsinin ölkənin şimal-qərbində təhlükəsizliyin yaradılması istiqamətindəki işlərə toxunub": Ölkənin şimal-qərb sərhədləri sabitdir".