Makronla Salman arasında görüş - Nüvə sazişi?
Səudiyyə Ərəbistanı vəliəhdi Məhəmməd bin Salman və Fransa prezidenti Emmanuel Makron paytaxt Parisdə bir araya gəlib.
Tərəflər qlobal istiləşmə, Ukrayna müharibəsi və İranın nüvə sazişini müzakirə ediblər.
Fransa Xarici İşlər Nazirliyindən verilən məlumata görə, liderlər iki ölkə arasındakı münasibətləri gücləndirmək, iqlim böhranı kimi qlobal və regional problemlərlə mübarizədə fikir mübadiləsi aparmaq üçün görüşüb.
Makron Rusiya qazından asılılığını azaltmağa çalışan Avropa ölkələrinin enerji təchizatını diversifikasiya etmək məqsədilə Səudiyyə Ərəbistanının başlatdığı koordinasiyanı davam etdirmələrinin vacibliyini vurğulayıb.
Məsələ ilə bağlı ətraflı məlumat verilməsə də, Makronun Səudiyyə Ərəbistanındakı insan haqları məsələlərinə toxunduğu da qeyd edilib.
Makronun 2018-ci ildə İstanbul Baş Konsulluğunda öldürülən səudiyyəli jurnalist Camal Qaşıqçının qətlinə görə məsul tutulan Məhəmməd Bin Salmanla görüşü insan haqları təşkilatları tərəfindən sərt tənqid edilib.
