"Qaçandan sonra ona şərt qoymuşdular ki, sussun..."

Xəbər verildiyi kimi, “Rosnano” korporasiyasının keçmiş rəhbəri Anatoli Çubays Avropa klinikalarından birində reanimasiyaya yerləşdirilib. Onda “Guillain-Barre” adlı xəstəlik tapıldığı bildirilir.

“Guillain-Barre” sindromu ifliclə nəticələnə bilən və özünü əzələ zəifliyində, ağrılarda, uyuşmalarda göstərən nadir xəstəlikdir. Bu xəbərdən dərhal sonra Çubaysın Rusiya xüsusi xidmət orqanları tərəfindən zəhərlənməsi versiyası irəli sürüldü.

Qeyd edək ki, son zamanlar formal olaraq Putinin müşaviri sayılan Çubays “Rosnano”nun rəhbəri postundan əvvəl Prezident Administrasiyasının rəhbəri, daha sonra Baş nazirin müavini, Maliyyə naziri kimi vəzifələr tutub və Rusiya hakimiyyətində ən məlumatlı adamlardan biri sayılıb.

Tanınmış rusiyalı hüquqşünas, vəkil Mark Feyqin öz şərhində Kremlin Anatoli Çubaysı aradan götürmək üçün kifayət qədər əsasının olduğunu bildirib: “Kreml Çubaysı zəhərləyə, aradan götürə bilərmi? Əlbəttə edə bilər. Çubays Putin, onun ətrafı və dövlət sirləri barədə nəhəng informasiyaların daşıyıcısıdır. Birincisi, o, Putin hakimiyyətə gələrkən baş verən hər şeyi bilir. İkincisi, demək olar 25 il ərzində Prezident Aparatında baş verən hər şeydən xəbərdardır”.

Feyqin deyib ki, Çubays istefa ərizəsini artıq Rusiyanı tərk edəndən sonra yazıb: “Düşünürəm ki, Çubays Rusiyadan getməyib. O, qaçıb! Ancaq qaçandan sonra ona şərt qoymuşdular ki, sussun və dinc dursun. O, susurdu. Çubays yalnız bu halda özünü xaricdə təhlükəsiz hesab edə bilərdi. Ancaq son zamanlar məlumat yayıldı ki, informasiya agentlikləri ondan müsahibə almağa çalışırlar. Bəs, niyə müsahibə vermir? Onu hədələyiblərmi? Biz bunu bilmirik və özü də bu barədə heç nə demir. Sözsüz ki, Çubaysın ətrafında hansısa proses gedir və bu prosesə birmənalı olaraq, Moskva və Rusiya xüsusi xidmət orqanları cəlb olunub”.