"Paşinyana görə Ermənistan yoxsulluğa düçar olacaq" - Türkiyəli millət vəkili
27 sentyabr səhər saatlarında Ermənistan Silahlı Qüvvələri tərəfindən Azərbaycan ərazisinin atəşə tutulması nəticəsində başlayan müharibədə humanitar atəşkəs elan olunub.
Bakı vaxtilə 10 oktyabr saat 12:00-da başlayan atəşkəs bir neçə dəqiqə sonra Ermənistan tərəfindən pozulub. Baş verən hadisələrlə bağlı Türkiyə Böyük Millət Məclisi Türkiyə-Azərbaycan Parlamentlərarası Dostluq Qrupunun sədri, millət vəkili Şamil Ayrım fikirlərini bakupost.az-a açıqlamasında deyib.
O, dəfələrlə bu müharibənin Azərbaycanın haqlı davası olduğuna diqqət çəkib:
“27 sentyabr günü başlayan müharibədə Azərbaycan Silahlı Qüvvələri BMT nizamnaməsinin 51-ci maddəsinə əsasən əks hücuma keçib. Bu müddət ərzində Ermənistan tərəfi təəssüf ki, mülki əhaliyə, yaşayış məntəqələrinə hücum edib. Əslində bu, yeni xəbər deyil. Ermənistan illərdir bu təxribatlarını davam etdirir. Günahsız insanları öldürür. Onların kitabında hüquq, ədalət adlı məfhumlar yoxdur. Beynəlxalq hüququn normalarına heç vaxt əməl etməyiblər. Etsəydilər, 1994-cü ildə BMT-nin qərarlarını yerinə yetirərdilər”.
Ş. Ayrım qeyd edib ki, Azərbaycan Ordusu indi çox güclüdür:
“Ermənilər indi də Azərbaycandan “bir az da qoparaq” prinsipi ilə yenidən hücuma başlayıblar. Amma qarşılarına çıxan ordu olduqca güclü və intizamlıdır. Artıq 30 il əvvəlki vəziyyət deyil. Ona görə Azərbaycan Ordusu lazımi cavabı verdi. Ermənistan isə ilk fürsətdə yenidən atəşkəsi pozdu”.
Millət vəkilinin sözlərinə görə, Azərbaycan hər iki tərəfdə haqlıdır:
“Azərbaycan həm beynəlxalq hüquqa əməl edir, həm də cəbhədə öz torpaqları uğrundan mübarizə aparır. Prezident İlham Əliyevin bu münaqişədə irəli sürdüyü tələblər olduqca haqlıdır. Azərbaycanda hazırda ordu, xalq və rəhbər arasında milli həmrəylik var. Bu mübarizədə Türkiyə də şəraitdən asılı olmayaraq Azərbaycana dəstəkdir. Ermənistan tərəfi İlham Əliyevin şərtlərini qəbul etsə, görüşmələr davam edəcək. Bu, onlar üçün də yaxşıdır. Əks təqdirdə Paşinyan adlı qatilin boş təkidlərinə görə Ermənistan yoxsulluğa düçar olacaq. Paşinyan öz xalqını belə düşünməyən nazirdir”.
Ayrım sonda əlavə edib:
“Türkiyə Azərbaycanın yanındadır. Bütün Türkiyədən Azərbaycana salamlar. Qarabağ bizimdir, Qarabağ Azərbaycandır!”
