Trampa cinayət işi açıla bilərmi?
ABŞ mediası Federal Təhqiqatlar Bürosunun (FTB) keçmiş Prezident Donald Trampın Floridadakı Mar-a-Laqo iqamətgahında aparılan axtarışla bağlı yeni məlumatlar yayıb.
Trampın özünün bildirdiyinə görə, FTB əməkdaşları onun şəxsi seyfini açıblar. Keçmiş Prezident axtarış vaxtı Nyu Yorkda olub.
FTB, hələlik informasiyanı şərh etməyib. Ancaq ABŞ mediası mənbələrə istinadla yazır ki, qurum əməkdaşları keçmiş Prezidentin Ağ Evi tərk edərkən özüylə götürdüyü xidməti, o cümlədən gizli sənədləri axtarıblar. Qanunla bu sənədlər dövlət mülkiyyətidir. ABŞ-ın Milli Arxivi uzun müddət sənədləri geri tələb edib. Onların bir hissəsi qaytarılıb. Bir neçə ay öncə Milli Arxiv Baş Prokurorluğa müraciət edərək Trampı sənədləri verməkdən imtina etməkdə suçlayıb.
“New York Times” yazır ki, FTB axtarış orderi əldə etməkdən ötrü hakimi əmin edib ki, potensial cinayət hərəkətlərini araşdırdığına inanmaq üçün əsasları var. Ekspertlərin fikrincə, keçmiş Prezidentin əlində əsaslandırılmamış şəkildə gizli sənədlərin olması üzə çıxardısa, bunu cinayət hərəkəti kimi təsnif etmək olar. Nəticədə Trampın ciddi-cəhdlə hazırlaşdığı 2024-cü il prezident seçkilərində iştirakı əngəllənəcək.
Keçmiş Prezidentlə bağlı təkcə sənədlərlə əlaqədar araşdırma aparılmır. Son vaxtlar yayılan məlumata görə, Baş Prokurorluq Trampın 2020-ci ildə prezident seçkisinin nəticələrinin təsdiqlənməsi proseduruna təsir göstərmək cəhdlərinin istintaqını genişləndirib. Tramp seçkidə məğlubiyyətini qəbul etmirdi.
Donald Tramp FTB-nin hərəkətlərini kəskin tənqid edib: “ABŞ-ın keçmiş Prezidentləri ilə belə şey baş verməyib. Müvafiq dövlət xidmətləri ilə əməkdaşlığımıza baxmayaraq, evimdə belə bir reydin keçirilməsi gərəksiz, yaxud yersiz idi”.
Nümayəndələr Palatasında respublikaçı azlığın başçısı Kevin Makkarti xəbərdarlıq edib ki, bu ilin noyabrında Konqresə seçkilərdə respublikaçılar çoxluğu qazanarsa, prokurorluğun keçmiş Prezidentə münasibətdə hərəkətləri təhqiqat obyekti olacaq.
Media xatırladır ki, Tramp prezident postunda olanda Mar-a-Laqo iqamətgahında xeyli vaxt keçirib. İqamətgahın bir hissəsi qolf klubu kimi istifadə olunur.
