ABŞ "F-35"lərin uçuşuna qoyulan qadağanı ləğv edib
ABŞ Hərbi Hava Qüvvələri katapult oturacaqlarının nasazlığına görə uçuşu dayandırılan “F-35” qırıcılarını yenidən işə salır.
Bu barədə “Air Force Magazine” jurnalı məlumat yayıb.
Jurnalın informasiyasına əsasən, potensial nasaz hissələr ABŞ-ın Sakit okean regionunda yerləşən hərbi hava qüvvələri bazaları və təlim mərkəzləri, eləcə də ABŞ Hərbi Hava Qüvvələri komandanlığının Avropadakı bazalarında yoxlanılıb. Ümumilikdə 349 təyyarə xüsusi təftişdən keçirilib.
Pilotların təhlükəsizliyi üçün vacib sayılan katapultları hərəkətə gətirən piropatronlar, o cümlədən oturacaq sistemləri sınaqdan keçirilib.
Qeyd edək ki, “F-35” təyyarələri hərbi hava texnologiyasının son nailiyyətlərindən biri hesab olunur. Bu təyyarələrin qiyməti 120 milyon dollar dəyərindədir. Məsələn, ötən ilin dekabrında Finlandiya dövləti 64 qırıcının alınması haqqında qərar qəbul edib və buna görə “Lockheed Martin” şirkətinə 8,6 milyard dollar ödəyəcək. Finlandiya həmçinin həmin təyyarələrə quraşdırılacaq 200 ədəd “AGM-158 JASSM” qanadlı raketləri də sifariş edib.
