"Rusiya Rumıniyanın demarşına adekvat cavab verəcək" - Zaxarova
"Rumıniya Rusiyanın Buxarestdəki səfirliyinin əməkdaşını heç bir səbəb olmadan, uydurma bəhanələrlə persona non-qrata elan edib”.
Xarici KİV-lər xəbər verir ki, bunu Rusiya Xarici İşlər Nazirliyinin sözçüsü Mariya Zaxarova deyib.
“Söhbət son aylarda Aİ və NATO-ya üzv ölkələrin böyük əksəriyyətində dəfələrlə sınaqdan keçirilmiş ssenari üzrə həyata keçirilən yeni təxribatdan gedir. Rumıniya hakimiyyətinin stereotipli hərəkətləri Qərb korporativ parametrlərinə maksimum sədaqət nümayiş etdirmək üçün nəzərdə tutulub”, - o vurğulayıb.
Zaxarova qeyd edib ki, Buxarestin müstəqil, milli yönümlü xətti burada görünmür və bu, vəziyyəti daha da gərginləşdirir. Diplomat əlavə edib ki, Rusiya Xarici İşlər Nazirliyi Rumıniyanın demarşına adekvat cavab verəcək və görülən tədbirlər barədə əlavə məlumat verəcək.
