Rusiya Tacikistandakı hərbi bazasını niyə boşaldır?

Rusiyanın Tacikistanda yerləşən iri hərbi bazasından 1500-dək əsgər Ukraynaya göndərilib.

Bu barədə informasiyaları bir neçə mənbədən "Azadlıq" radiosuna təsdiq ediblər. 

Mənbələr daha 600 əsgərin paytaxt Düşənbə və ölkənin cənubundakı Boxtar şəhərindən Ukraynaya aparılacağını bildirib.Tacikistan və Qırğızıstanın hərəsində Rusiyanın bir hərbi bazası var. Tacikistanda saxlanan şəxsi heyətin sayı 7 min, Qırğızıstanda isə 500-dür. Ancaq dəqiq say heç vaxt ictimailəşdirilməyib.

Rusiyanın regiondakı hərbi bazalarından jurnalistlərin bu barədə suallaına cavab verilməyib. 201-ci bazadan baş media əməkdaşı Vasiliy Maxovoy sözügedən iddianı təsdiq və ya təkzib etmək istəməyib.

Ancaq bir neçə başqa mənbə, o cümlədən bir neçə əsgər və bazaların yerli işçiləri bəzi əsgərlərin Ukraynaya göndərildiyini təsdiqləyib. Sakinlər və yerli dükan və restoranların işçiləri də onların məkanlarına tez-tez gələn rus əsgərlərinin sayında ciddi azalma hiss etdiklərini deyiblər.1000 – 1500 rusiyalı əsgərin artıq Ukraynaya göndərildiyi, daha bir neçə yüz əsgərinsə müharibəyə göndərilməzdən öncə təlim keçməkdə olduğu bildirilib.

Anonimlik şərtilə danışan iki rus əsgəri avqustun 27-də qarşıdakı günlərdə daha 600 əsgərin Ukraynaya göndəriləcəyini deyib.Rusiya ordusuna məxsus anbarda çalışan bir mülki tacikistanlı son aylarda rusların sifariş etdiyi ərzağın həcminin azaldığını deyib. Adının çəkilməsini istəməyən işçi bunun bazadakı rus əsgərlərinin sayının azalması ilə bağlı olduğunu vurğulayıb. Onun sözlərinə görə, əsgərlərə Ukraynaya müvəqqəti göndərildikləri bildirilib.

"Bildiyim qədər əsgərlər orada dörd aydan çox qalmamalı idilər. Onlar Ukraynadakı xüsusi hərbi əməliyyatda iştirak edib yenə bura qayıdacaqdılar. Ancaq hələ qayıtmayıblar. Deyirlər ki, əsgərlər dörd aylarını tamamladıqdan sonra məzuniyyətə gediblər", – o deyib.

ABŞ-ın hesablamalarına görə, artıq avqustun əvvəllərində 80 minədək Rusiya hərbçisi Ukraynada öldürülüb və ya yaralanmışdı. Rusiya ölüm saylarını müntəzəm ictimailəşdirmir.Rusiya rəsmilərinin ordu sıralarını doldurmaq üçün muzdluları və hətta dustaqları döyüşə göndərdiyi deyilir. Çox sayda rus əsgəri və müqaviləli döyüşçüsünün Ukraynaya öz razılıqları olmadan aparıldıqları bildirilir.

Tacikistanda hələ SSRİ dövründə yaradılmış 201-ci atıcı diviziya Moskvanın Rusiya xaricindəki ən böyük hərbi bazalarından biridir, şəxsi heyətinin sayı bir neçə mindir.