Ermənistan "MİR"dən çıxır...
Ermənistanda banklar tərəfindən Rusiyanın “Mir” ödəniş sistemi kartlarının qəbulu dayandırılıb.
“İnterfaks” xəbər verir ki, Ermənistan Mərkəzi Bankı bununla bağlı açıqlama verib.
Qurum bəyan edib ki, Ermənistanın kommersiya bankları sanksiyalarla bağlı “Mir” kartlarına xidmət göstərib-göstərməmək qərarını özləri verirlər:
“Kommersiya bankları sanksiya riskləri də daxil olmaqla, öz risklərini özləri idarə edirlər. Müştərilərə xidmət prosesindəki qayda dəyişikliklərini də əvvəlcədən onlara çatdırırlar”.
Ermənistan mətbuatının yazdığına görə, artıq ölkədə “Mir” kartlarına xidmət dayandırılıb.
Qeyd edək ki, ötən həftə ABŞ Maliyyə Nazirliyi “Mir” kartlarına xidmət göstərən ölkələrin müvafiq qurumlarına Rusiyanın sanksiyalardan yayınmasına yardım göstərilməsi ehtimalı və onunla bağlı mümkün sanksiyalar barədə xəbərdarlıq edib. Nəticədə, Türkiyədə bu kartları qəbul edən iki ən böyük bank – Türkiyi İş Bankası və DenizBank onlara xidməti dayandırıb. Ziraat Bankası, HalkBank və VakıfBank isə müəyyən məhdudiyyətlər tətbiq etməyə başlayıb.
