Narışkin Qərbi ittiham etdi - "Əlimizdə sübutlar var"

Rusiyanın Avropaya qaz ixrac etdiyi iki boru kəmərində eyni vaxtda terror aktları törədilib. Modern.az xəbər verir ki, bu barədə Rusiya KİV-lərinin yaydığı məlumatda bildirilib.

Danimarka və İsveç səlahiyyətlilərinin məlumatına görə, Bornholm adasının yaxınlığında "Şimal axını 1"də iki, "Şimal axını 2"də bir qaz sızması aşkar edilib. Almaniya, Danimarka və İsveç hədəflənmiş təxribatı istisna etmir. Rusiya tərəfi insident məlum olan kimi Danimarkadan “Şimal axını 1”də fövqəladə vəziyyətlə bağlı rəsmi məlumat istəyib. Danimarka hakimiyyəti qaz sızması yerində baş verən partlayışlar barədə Rusiya Federasiyasına məlumat verib.

NATO-nun iclasında Danimarka rəsmiləri bildiriblər ki, "Şimal axını 1" və "Şimal axını 2" qaz kəmərlərinin hər biri iki partlayış nəticəsində zədələnib.

Artıq Rusiya “Şimal axını” kəmərlərindəki  partlayışlara görə Qərbi ittiham etməyə başlayıb. Belə ki, Rusiya Xarici Kəşfiyyat Xidmətinin direktoru Sergey Narışkin “Şimal axını”ndakı partlayışlara münasibət bildirib.

Sergey Narışkin deyib ki, “Şimal axını”ndakı partlayışlar beynəlxalq terror aktıdır, Rusiyanın bu cinayətin arxasında Qərbin dayandığına dair sübutları var, baxmayaraq ki, o, əsl təşkilatçıları və icraçıları gizlətməyə çalışır.

“Qərb bu beynəlxalq terror aktının əsl təşkilatçılarını və icraçılarını gizlətmək üçün hər şeyi edir”, – Narışkin jurnalistlərə bildirib.

“Bizdə artıq bu terror aktının təşkilində və həyata keçirilməsində Qərbin izinə işarə edən bəzi materiallar var”, - deyə direktor əlavə edib.