BMT-də qalmaqal - Rusiya "münasibətləri yenidən dəyərləndirməyi" tələb edir

Rusiya BMT-nin baş katibi Antoniu Quterrişlə və təşkilatın Katibliyi ilə onların Ukraynaya, Ukrayna və Qərb siyasətçilərinin sözlərinə görə, İranda hazırlanan və Rusiya qoşunları tərəfindən Ukrayna şəhərlərinə hücumlar üçün istifadə edilən pilotsuz uçuş aparatlarının müayinə edilməsi məqsədilə ekspertlər göndərəcəyi təqdirdə "əməkdaşlığı yenidən dəyərləndirməklə" təhdid edir.

Bu barədə Rusiyanın BMT-dəki daimi nümayəndəsinin müavini Dmitri Polyanski "RBK" agentliyinə müsahibəsində danışıb.

"BMT-nin Katibliyinə gəldikdə, onun BMT Təhlükəsizlik Şurasının 2231 qətnaməsinə aid olanları araşdırmaq üçün mandatı yoxdur. Biz ümid edirik ki, Katiblik və baş katibin özü yenidən BMT Təhlükəsizlik Şurasının qərarlarını pozmayacaq, özünün texniki mandatından kənara çıxmayacaq və hər hansı qeyri-qanuni araşdırmalarda iştirak etməkdən çəkinəcək. Əks halda bizim onlarla əməkdaşlığımızı yenidən dəyərləndirmək lazım gələcək, bu da heç kimin maraqlarına uyğun deyil. Biz bunu istəmirik, amma başqa yol qalmayacaq", - Polyanski deyib.

Ukraynanın BMT-dəki daimi nümayəndəsi Sergey Kislitsa Polyanskinin bəyanatını kifayət qədər tənqidlə şərh edib.

"Həqiqədən BMT-nin nə zamansa gördüyü ən iyrənc şəxslərdən birinin abdal məntiqidir", - o, "Twitter" səhifəsində yazıb.
Payızın əvvəlindən Rusiya Ukraynaya raket zərbələri üçün İranın "Şəhid-136" (rusiyalılar onu "Geran-2" adlandırır) kamikadze-dronlardan istifadə edir.

Sentyabrın 24-də Ukrayna XİN İrana "Rusiyaya ukraynalıların qətli üçün silah tədarükünü dərhal dayandırmağa və özünə haqq qazandırmamağa" çağırış edib.

İranın xarici işlər naziri Hüseyn Əmir Abdullahiyan cavabında bəyan edib ki, Tehran Rusiyaya Ukraynaya qarşı müharibədə istifadə etmək üçün hər hansı silah verməyib.

Lakin Ukrayna HHM müntəzəm olaraq "Şəhid-136" dronlarını vurur.

Oktyabrın 17-də Kiyevin Şevçenko rayonunda İran kamikadze-dronlarının hücumu nəticəsində yaşayış evində partlayış baş verib. Nəticədə beş nəfər, o cümlədən 34 yaşlı hamilə qadın həlak olub.

Ukraynanın xarici işlər naziri Dmitri Kuleba məlumat verib ki, o, Ukrayna prezidenti Vladimir Zelenskiyə İranla diplomatik münasibətlərin kəsilməsi barədə təklif irəli sürəcək.

"İranın hərəkətləri namərdlik və yalandır və biz buna dözməyəcəyik", - Kuleba deyib. 

Öz cavabında İran XİN nümayəndəsi Nasir Kənani bəyan edib ki, belə "əsassız bəyanatlar" bəzi ölkələrin KİV-lərinin İran İslam Respublikasına qarşı məqsədyönlü və siyasi təbliğat xaralterli kampaniyasının bir hissəsidir.

İran siyasətçisi əmin edib ki, İran "belə ittihamların əsassız olduğunu" sübut etmək üçün Ukrayna ilə danışıqlara hazırdır. 

Bu yaxınlarda isə İran Rusiyaya "yer-yer" tipli raketləri və əlavə PUA-lar tədarük etməyi vəd edib.