ABŞ və İsrail regionda və onun hüdudlarından kənarda İranın mənfi təsirini müzakirə ediblər
ABŞ-ın dövlət katibi Entoni Blinken çərşənbə axşamı Vaşinqtonda İsrail prezidenti İsaak Hersoqla görüşüb. Dövlət Departamentinin məlumatına görə, onlar "ikitərəfli münasibətlərin möhkəmliyini təsdiq ediblər və ümumi təhlükəsizlik problemlərini, o cümlədən Rusiyanın Ukraynada təcavüzkar müharibəsini və İranın regionda məhvedici təsirini müzakirə ediblər".
"Bizim ürəyimiz İran xalqının yanındadır. İran qadınları gündən-günə sıxışdırılırlar və hücuma məruz qalırlar, İran silahlarından isə Ukraynada dinc sakinlərə, günahsız mülki şəxslərə qarşı istifadə olunur", deyə prezident Hersoq görüşdən əvvəl bildirib.
Blinken, öz növbəsində, əlavə edib ki, ABŞ və İsrail İranın regionda və "onun hüdudlarından çox-çox kənarda" atdığı təhlükəli, sabitliyi pozan əməllərə və terror aktlarına qarşı "birgə mübarizə aparırlar".
"İranın Rusiyanın Ukraynaya və Ukrayna xalqına qarşı təcavüzü davam etdirməsini təmin etmək üçün ona PUA verməsi dəhşətli nəticələr verir və biz buna qarşı mübarizə aparmaq qətiyyətindəyik", deyə Blinken əlavə edib.
Bu gün Hersoq Ağ Evdə prezident Baydenlə görüşəcək. ABŞ rəsmiləri səfəri "ABŞ və İsrail arasında möhkəm tərəfdaşlığı və dostluğu vurğulayan" addım kimi səciyyələndiriblər.
Ağ Evin məlumatına görə, Bayden və Hersoq qarşılıqlı maraq doğuran regional və qlobal problemlər də daxil olmaqla, əsas məsələlərlə bağlı məsləhətləşmələr aparacaqlar.
