“Ermənilərin Naxçıvana raket atmasının iki səbəbi var“ - Polkovnik

Müdafiə Nazirliyinin məlumatına görə, Ermənistan silahlı qüvvələri ötən gün saat 10:44 radələrində işğal olunmuş Qubadlı rayonu ərazisindən Ordubad rayonu ərazisinə raket zərbəsi endirib. Xoşbəxtlikdən hadisədə dinc sakinlərə və mülki obyektlərə zərər dəyməyib.

Azsiyasət.com yenisabah.az-a istinadən xəbər verir ki, ehtiyatda olan polkovnik Şair Ramaldanov məsələ ilə bağlı açıqlamasında ermənilərin bu cür addımlar ataraq ilk növbədə dinc əhalini təşvişə salmaq istədiyini bildirib: 

“Naxçıvan da Azərbaycandır və Azərbaycana edilən atəşlər Naxçıvandan da yan keçməyib.  İndiyədək atmırdılar, bunun olması gözlənilən bir hal idi. Çünki ermənilər cəbhə bölgəsində  cavab verə bilmirlər. Azərbaycana bütün istiqamətdə atəş açmaqla evlərini dağıtmaq, dinc əhalini təşvişə salaraq insanları ayağa qaldırmağa cəhd edir. Onların fikri 1993-cü ilə gedib. Ancaq bilmək lazımdır ki, Azərbaycan o vaxtkı Azərbaycan deyil. Xalq da, ordu da dəyişib”.

Hərbi ekspertin fikrincə, ermənilərin digər bir məqsədi münaqişənin coğrafiyasını genişləndirməkdir:

“Ermənistan üçün nə qədər çox dövlət bu məsələyə qarışsa, o qədər yaxşıdır, bu onlara sərf edər, çünki özləri heç nə edə bilmirlər. Vəziyyət cəbhə bölgəsində rahatlıqla görünür, Paşinyanın son çıxışı da bunu təsdiq edir. İstəyirlər ki, Azərbaycan Ermənistan sərhəddini pozsun və onlar əllərində bayraq tutaraq öz havadarlarına, KTMT üzvlərinə müraciət edə bilsinlər. Bununla Dağlıq Qarabağda prosesləri müəyyən qədər yayındırmaq istəyirlər”.

Həmsöhbətimiz vurğulayıb ki, Ermənistanın bu davranışında həm də öz daxili auditoriyasına yönələn hədəf var:

“Onlar Ordubada  da atəş açmaqla, “Biz güclüyük, istəyəndə  Gəncəni vura, Azərbaycana zərbələr endirə bilirik, Naxçıvan da çox hoppanıb düşməsin. Biz lazım olsa, onların da dərsini verəcəyik. Görürsüz, biz atırıq, heç cavab atəşi atmırlar”, -demək istəyirlər. Yəni bu, populist addımlardır. Hazırda Azərbaycan dövləti tərəfindən müəyyən tədbirlər görülür və Xarici İşlər Nazirliyi vasitəsilə bütün beynəlxalq qurumlara Ermənistanın Azərbaycan ərazisinə atəş açması ilə bağlı fakta söykənən məlumatlar verilir. Azərbaycan həmin obyektləri hərbi-legitim obyekt adlandıraraq cavab atəşi ilə məhvetmək hüququnu özündə saxlayır. Sadəcə indi hüquqi baza hazırlanır. Düşünürəm ki, bütün bu əsaslar əldə olunduqdan sonra lazımi addım atılacaq. Azərbaycanda olan texniki vasitələr, peyklər onların hansı nöqtədə nə atdıqlarını qeydiyyata ala bilir. Son zamanlar onlar Kəlbəcər rayonuna da gətirməyə məcbur oldular ki, sırf Azərbaycan ərazisi olsun. Ermənilərə təminat verən dövlətlər  müəyyən tələblər qoyurlar, çünki Ermənistan ərazisinə təcavüz olmayıb. Olsa belə, bu, Ermənistanın təcavüzünün cavabı kimi qəbul olunacaq. Cənab Prezident öz sözünü deyib və Azərbaycan üçün təhlükə yarada biləcək obyektləri Azərbaycan Ordusu tərəfindən darmadağın edəcək”.

Mütəxəssis Ermənistanın boş əraziyə raket atmasının iki səbəbi olduğunu diqqətə çatdırıb:

“Ordubada atdıqları raket şükür ki, açıq əraziyə düşüb. Onların boş yerə raket atmasının iki səbəbi var. Birincisi, ola bilər ki, şəxsi heyətlərinin hazırlığı aşağı səviyyədədir. İkincisi isə o raketlərin köhnə olma ehtimalı var. Düşünmürəm ki, ermənilər bilərəkdən Naxçıvanda boş yerə atəş açsınlar. Çünki bu sadəcə top atəşi deyil, müəyyən vəsait aparan raketlərdən istifadə olunub. Onlar bilərək bunu etməz”.