Ermənistan Təhlükəsizlik Şurasının katibi Rusiyanı vədlərini yerinə yetirməməkdə ittiham edib

Rusiya Soçi bəyanatına Dağlıq Qarabağ haqqında qeyd daxil etməyi vəd edib, amma bu, baş verməyib. Bu barədə Ermənistanın Dövlət Təhlükəsizlik Şurasının rəhbəri Armen Qriqoryan bildirib.

"Biz bir neçə dəfə çalışmışıq ki, Rusiyanın təkliflər paketi dəqiq ifadə olunsun, orada Dağlıq Qarabağ münaqişəsindən danışılsın. Rusiya tərəfi bunun olacağına söz verib, amma bu, baş verməyib.

Biz həmçinin sülhməramlıların Dağlıq Qarabağda yerləşməsi haqqında dəqiq qeyd olmasını istəyirdik, amma Soçidə yekun bəyanatda bu da əksini tapmayıb", deyə Qriqoryan Factor.am nəşrinə müsahibəsində bildirib.

"Rusiya tərəfi açıq şəkildə bildirib ki, onun Ermənistan tərəfi üçün yaxşı təklifləri var. Ermənistan, öz növbəsində, bildirib ki, bu gündəliyi tamamilə dəstəkləyir.

Hazırda masada 2 sənəd var - biri bizim üzərində işlədiyimiz Azərbaycanın təklifləri, digəri sülh sazişinin parametrləri haqqında ideyaları əks etdirən Rusiyanın təklifi. Qərb sadəcə olaraq variant axtarmağa kömək edir", deyə o sözünə davam edib.

Qriqoryan təsdiq edib ki, tərəflər Azərbaycanın təklif etdiyi beş bənddən ibarət paket üzərində işləyirlər.

"Ermənistan bir çox cəhətdən yalnızdır. KTMT-dən lazımi reaksiya yoxdur. Təbii ki, Ermənistan heç vaxt dəhliz verməyəcək, biz bilirdik ki, bu yaxınlarda təcavüzün səbəblərindən biri Ermənistanın dəhliz verməkdən imtina etməsi idi və onlar Ermənistana təzyiq göstərməyə çalışırlar", deyə Qriqoryan bildirib.

Qeyd edək ki, indiyədək "Vaşinqton" və "Rusiya" nizmalanma variantlarını heç kim açıqlamayıb. Əksər müşahidəçilərin fikrincə, əslində bu sənədlər yoxdur. Amma bir sıra Ermənistan mənbələri iddia edirlər ki, Rusiya variantı "Xovayev Planı"dır (ATƏT-in Minsk Qrupunun Rusiyalı həmsədri).

Sentyabrın əvvəllərində Xovayev Yerevana və Bakıya səfər edib, RF XİN tərəfindən işlənib hazırlanmış nizamlanma ideyalarını təqdim edib. Bu təkliflərin mahiyyəti Rusiya, Azərbaycan və Ermənistan liderlərinin daha əvvəl imzalanmış üçtərəfli bəyanatlarından fərqlənmirdi. Onlar kommunikasiyaların açılmasını, münasibətlərin normallaşmasını, sərhədlərin demarkasiyasını və s. nəzərdə tuturdu. Təkcə bir prinsipial fərq var idi. Sənəddə deyilirdi ki, tərəflər Dağlıq Qarabağın statusu məsələsinin həllini gələcəyə saxlamağa razılaşırlar.

Vladimir Putin də Valday Forumunda çıxışında Rusiya variantının ermənilər üçün daha sərfəli olduğunu, belə ki, Qərbin təkliflərində Qarabağın Azərbaycanın tərkibində tanındığını deyərkən məhz bunu nəzərdə tuturdu.