"Mən Rusiya vətəndaşlığından imtina etmişəm" - Vardaryan
Qondarma rejimin “dövlət naziri” Ruben Vardanyan Azərbaycan Prezidenti İlham Əliyevin “ Biz Qarabağda yaşayan ermənilərlə danışmağa hazırıq, lakin Moskvanın göndərdiyi Vardanyan kimi adamlarla deyil” bəyanatına münasibət bildirib.
“Armenpress” xəbər verir ki, bu barədə Ruben Vardanyan “Facebook” səhifəsində yazıb: “Mən Azərbaycan Prezidenti İlham Əliyevin “Artsax”la birbaşa dialoqa başlamaq istəyini alqışlayıram.
Mən, həmçinin, beynəlxalq vasitəçiliklə birbaşa danışıqların yeni formatının yaradılmasını da alqışlayıram. Beynəlxalq vasitəçilər arasında Rusiya və ABŞ arasında mütləq Fransa da yer almalıdır. Çünki Fransa Senatının bir neçə gün əvvəl qəbul etdiyi qətnamədə “Dağlıq Qarabağ”ın tanınması ilə bağlı bənd var. Nəzərinizə çatdırım ki, Fransa həm də ATƏT-in Minsk qrupunun həmsədr ölkəsidir.
Mən həm də təklif etmək istərdim ki, daha konstruktiv tona keçək və mənim “aydın gündəliyim”in nədən ibarət olduğuna dair aydınlıq gətirim. Mən dəfələrlə vurğulamışam ki, “Artsax” xalqının maraqlarından başqa, daha doğrusu, “Artsax”da başqasının maraqlarını qoruya biləcəyimlə bağlı ittihamlardan qaçmaq üçün Rusiya vətəndaşlığından imtina etmişəm. Düşünürəm ki, mən cənab Əliyevin təklif etdiyi nümayəndə kriteriyalarına tam cavab verirəm: “Qarabağda yaşayıram və orada yaşamaq istəyirəm”.
Müharibə həmişə müharibə gətirir. Bəzən bu, bir neçə nəsildən sonra belə olur. Bugünkü müharibə xalqlarımızın gələcək nəsilləri üçün saatlı bir bombadır. Bu, o deməkdir ki, hər iki tərəfin liderləri bütün məsuliyyəti öz üzərinə götürməli və nə qədər çətin olsa da, danışıqlar masası arxasına əyləşib qanı dayandırmalıdırlar”.
