"Kremlə bağlı, kriminal keçmişə malik oliqarxlar Latviyada..." - "The Insider"

Kremlə bağlı olan və Müdafiə Nazirliyindən müqavilələr alan rusiyalı milyarderlər-İskəndər Mahmudov və Andrey Bokarev şəxsən və başqa insanların vasitəsilə Latviyada bizneslə məşğul olurlar.

Bu barədə “The Insider” araşdırma mərkəzi məlumat yayıb.

Araşdırma müəlliflərinin fikrincə, adıçəkilən milyarderlər 2017-ci ilə qədər “Kalaşnikov” konserninin səhmlərinə sahib olublar və onlara aid “Kolomenski zavodu” Rusiya hərbi gəmiləri üçün dizel mühərrikləri tədarük edir. Sahibkarların “Kalaşnikov” silah konsernində biznes tərəfdaşlarından biri hazırda Rusiya müdafiə nazirinin müavini Aleksey Krivoruçko olub.

Mahmudov və Bokarevin Rusiya aktivləri arasında dövlətin ən böyük podratçılarından sayılan “Ural Mədən-Metallurgiya Şirkəti”, “Kuzbassrazrezugol”, “Transmaşholdinq” şirkətləri də var.

Latviyada vasitəçilər şəbəkəsi vasitəsilə həmin şəxslər “Riqa Elektrik Maşınqayırma Zavodu”na (Rīgas elektromašīnbūves rūpnīca (RER) və onun maşın və avadanlıqlarının topdan satışı ilə məşğul olan törəmə müəssisəsi “LATVO”ya sahibdirlər. PER-in illik dövriyyəsi demək olar ki, 33 milyon avroya çatıb. Şirkət bütün Avropada fəaliyyət göstərir və  hətta Avropa Birliyinin fondlarından yardım alır. Bu ilin may ayında “RER” Çexiyada trolleybuslar və elektrik avtobusları üçün yeni elektrik mühərriki təmin edib.

“The Insider”in yazdığına görə, Mahmudov və Bokarev həmin zavoda “Holding TransComponent” və “Krona Group” ASC vasitəsilə nəzarət edirlər. Adları çəkilən sonuncu şirkətlərin nominal sahibləri isə İqor Lozovoy və Litva vətəndaşı Sergeyus Qreçukas adlı şəxslərdir. “Krona Group” Riqa Elektrik Maşınqayırma Zavodunun eksklüziv distribyutoru, eləcə də Mahmudov və Boçkarevə məxsus “Mərkəzi Şəhərətrafı Sərnişin Şirkətinin” (MŞSŞ) podratçısıdır. Sergeyus Qreçukas əvvəllər RER-in rəsmi tərəfdaşı olan və rusiyalı milyarderlərə məxsus olan “Transmaşholdinq”də işləyib.

Bundan əlavə, “MŞSŞ” vasitəsilə sahibkarlar Estoniyanın ən varlı qadınlarından biri və Moskva şəhərinin vitse-meri Maksim Liksutovun keçmiş həyat yoldaşı Tatyana Liskutova ilə əməkdaşlıq edirlər. Liskutova, Mahmudov və Bokarev birlikdə Cənubi Kiprin “Fredlake Holdings” şirkətinin sahibi olublar. Bu şirkət  Moskva metrosu ilə müqavilələr bağlayaraq yüz milyardlarla rubl qazanıb. Həmin prosesə isə vitse-mer Maksim Liksutov kuratorluq edib.

Mərkəzin məlumatına görə, Mahmudov və Bokarevin adı cinayət yolu ilə əldə edilmiş çirkli pulların yuyulması işində hallanır. Onlara qarşı Almaniya və İspaniyada ittihamlar qaldırılıb.