İran Avropanı qarışdırdı - "Pilotsuz təyyarələrin Moskvaya ötürülməsi BMT TŞ-ın 2231 saylı qətnaməsi ilə qadağan olunmayıb"
Birləşmiş Ştatlar BMT-nin baş katibi Antonio Quterreşi İranın Rusiyaya pilotsuz uçuş aparatlarını (PUA) təhvil verməsi ilə bağlı davam edən təhqiqat səbəbi ilə Kremlin təhdidlərinə boyun əyməkdə ittiham edib.
Bu barədə "Reuters" agentliyi ABŞ-ın təşkilatdakı səfirinin müavini Robert Vudun bəyanatına istinadən məlumat yayıb.
“Biz təəssüf edirik ki, BMT bu pozuntu ilə bağlı normal araşdırma aparmayıb. Katibliyin Rusiyanın təhdidlərinə boyun əyərək, BMT Təhlükəsizlik Şurası tərəfindən ona verilən araşdırma mandatını yerinə yetirməməsindən məyusuq”, - diplomat bildirib.
Bundan əvvəl Rusiya Federasiyasının BMT-dəki daimi nümayəndəsi Vasili Nebenzya təşkilatın Katibliyini Qərb ölkələrinin təzyiqlərinə boyun əyməməyə və 2231 saylı Qətnamə əsasında araşdırmada iştirak etməməyə çağırıb. Onun fikrincə, təşkilatın katibliyi Nizamnaməni pozmamalıdır.
İran Rusiyaya pilotsuz təyyarələrin verilməsi ilə bağlı Qərbin ittihamlarına cavab verib. Tehran respublikanın BMT-dəki daimi nümayəndəsi Əmir Səid İrəvaninin sözlərinə görə, pilotsuz təyyarələrin Moskvaya ötürülməsi BMT Təhlükəsizlik Şurasının 2231 saylı qətnaməsi ilə qadağan olunmayıb.
