ABŞ mətbuatı Qarabağdakı Rusiya sülhməramlılarının özbaşınalığından yazıb
ABŞ-ın geniş oxucu kütləsinə malik nüfuzlu “Frontpage Magazine” jurnalında “Qafqazda Rusiyaya əlvida?” sərlövhəli məqalə dərc olunub.
Tanınmış israilli politoloq və jurnalist, Dona Qrasiya Diplomatiya Mərkəzinin təsisçisi və baş direktoru Reyçel Avrahamın qələmə aldığı məqalədə İkinci Qarabağ müharibəsi bitdikdən sonra Azərbaycanın Qarabağ bölgəsinə Rusiya sülhməramlılarının yerləşdirilməsi diqqətə çatdırılmaqla Ukraynada apardığı amansız müharibə fonunda Rusiyanın Qafqaz regionunda sülhü qorumaq üçün münasibliyi və zəruriliyi şübhə altına alınıb.
Qeyd olunub ki, Rusiya sülhməramlılarının nəzarətində olan ərazilərdə Azərbaycan hərbçilərinə qarşı dəfələrlə silahlı təxribatlara əl atmış, o cümlədən ordumuzun mövqelərini atəşə tutmuş erməni silahlı birləşmələri hələ də qalmaqdadır. Bu birləşmələr Rusiya sülhməramlı qüvvələrinin birbaşa himayəsi altında yeni hərbi mövqelər qurmağa, səngərlər qazmağa və müdafiə zonası yaratmağa çalışırlar.
Rusiya sülhməramlılarının erməni separatçı qruplaşmalarını silahlandırırmaqla onlara açıq dəstək verdiyini qeyd edən müəllif bunun məlum üçtərəfli bəyanatın maddələrinin yerinə yetirilməməsi kimi qiymətləndirib. İsrailli politoloq Şuşa daxil olmaqla Qarabağın bölgələrinin adlarını ermənicə yazdıqlarına görə Azərbaycan tərəfinin Rusiya sülhməramlılarına səkkiz dəfə memorandum ünvanladığını və sülhməramlıların buna görə Rusiya Müdafiə Nazirliyini günahlandırdığını da diqqətə çatdırıb. Məqalədə bütün bunlar Rusiya sülhməramlılarının Qarabağdakı erməni separatçılarını dəstəkləməsi və sülh prosesini pozması kimi qiymətləndirilib.
Müəllif Rusiyanın nə Qarabağda fəaliyyət göstərən erməni silahlı birləşmələrinin qarşısını almağa, nə də Rusiya sülhməramlılarının yerləşdirildiyi Azərbaycan ərazilərində faydalı qazıntıların Ermənistan tərəfindən qeyri-qanuni istismarına son qoymağa müvəffəq olduğunu diqqətə çatdırıb. Üstəlik, məlum olub ki, erməni iş adamları ilə yanaşı, Rusiya sülhməramlılarının komandanı general Volkov Azərbaycanın təbii sərvətlərinin, o cümlədən qızıl və digər faydalı qazıntıların qanunsuz istismarında iştirak edib.
Məqalədə həmçinin qeyd olunub ki, Rusiya sülhməramlıları nəzarət etdikləri əraziyə 14 İran vətəndaşının sızmasını təşkil etməklə İranın bölgədəki mövcudluğunu gücləndiriblər. Belə ki, bu şəxslərdən 12-si xeyli sayda erməni icmasının yaşadığı İranın cənub-qərbində yerləşən Xuzistanın İzhe şəhərindəndir. Bildirilib ki, sözügedən sızma Ermənistanın baş naziri Nikol Paşinyanın 2022-ci il noyabrın 1-də İran İslam Respublikasına rəsmi səfərindən sonra baş verib. Səfər çərçivəsində Ermənistan və İran arasında səmimi görüşlər və hərtərəfli danışıqlar aparılıb. Məqalədə iki dövlət başçısının birgə mətbuat konfransında səsləndirilən bəyanata istinad edilib: “Biz iki ölkə arasında iqtisadi və siyasi əlaqələrin və onların gizli potensialının öyrənilməsinin vacibliyini vurğuladıq”.
