Ermənistanın spikerindən Laçın yolu açıqlaması...
Azərbaycanın rəsmi səviyyədə Laçın yolunun açıq olduğuna dair çoxsaylı bəyanatlarına baxmayaraq Ermənistan rəsmiləri israrla məsələni gündəmdə saxlamağa, bundan ucuz siyasi məqsədləri üçün istifadə etməyə çalışırlar.
Növbəti belə “qəhramanlığı” Ermənistan Milli Məclisinin spikeri Alen Simonyan göstərib.
O, yerli mətbuata açıqlamasında deyib ki, Ermənistan Laçın yolunun “açılması üçün" Azərbaycanla danışıqlarda iştirak etməyəcək.
Simonyan lideri Paşinyan kimi yenə həddini aşıb, Xankəndindəki separatçıların Bakı ilə danışa biləcəyini və buna cəhd etdiklərini iddia edib.
Qeyd edək ki, Ermənistan Baş naziri Nikol Paşinyan da yanvarın 10-da keçirdiyi mətbuat konfransında verdiyi bəyanatlarda İrəvanla separatçı rejim arasında guya, hansısa “fikir ayrılığının” olduğunu nümayiş etdirməyə çalışıb. Ancaq İrəvanın Azərbaycanın ərazi bütövlüyünü tanımaqdan qaçması bunun da ermənilərin yeni oyunu olduğunu söyləməyə əsas verir.
Alen Simonyan İrəvanın Laçın yolu ilə danışıqlara niyə daxil olmaq istəməməsini gülünc arqumentlə əsaslandırmağa cəhd edib. O bildirib ki, guya Ermənistan bunu etsə, onda üçtərəfli bəyanatı etibarsız elan etməli olacaq.
“Ermənistanın xarici işlər naziri elə bu səbəbdən həmkarları ilə dekabrda Moskvada keçirilən görüşə qoşulmayıb” –deyə, spiker növbəti dəfə saxtakarlıq edib.
“Ermənistanın Laçın yolu ilə bağlı danışıqlarda iştirak etməməsini düzgün sayırmı” sualına Simonyan cavab olaraq bildirib ki, “Üçtərəfli razılaşmada” Ermənistan tərəfinin Laçın yolu ilə bağlı hər hansı addımları nəzərdə tutulmayıb. Ona görə də, İrəvanın bu danışqlarda iştirak etməyəcəyini, edərsə bunun 9 noyabr bəyanatını ləğv olacağını iddia edib(azpolitika.info).
