Azərbaycan və Rumıniya enerji təchizatı üzrə yeni saziş imzalayacaqlar
Rumıniya prezidentinin Azərbaycana hazırkı səfəri zamanı müzakirə olunan və həll olunan məsələlər strateji əhəmiyyət kəsb edir. Bunu Prezident İlham Əliyev Rumıniya Prezidenti Klaus Yohanneslə birgə keçirdiyi brifinqdə deyib.
Onun sözlərinə görə, tərəflər qarşılıqlı ticarəti artırmaq niyyətindədirlər və bu vəzifə Buxarestdə görüşəcək Hökumətlərarası Komissiya qarşısında qoyulub.
İkitərəfli münasibətlərdə enerji də mühüm rol oynayır. “İndi əməkdaşlığımız yeni mərhələyə qədəm qoyur. Buxarestdə Azərbaycan təbii qazının Rumıniyaya tədarükü haqqında saziş imzalanıb. Rumıniyanın infrastrukturu vasitəsilə Azərbaycan qazı digər Avropa ölkələrinə də nəql olunacaq”, - deyə Əliyev bildirib.
Digər sahə yaşıl enerjidir. Bu istiqamətdə çox mühüm addım atılıb və ilk Yaşıl Enerji Məşvərət Şurası fevralın 3-də keçiriləcək. “Bu, çox strateji layihədir, böyük investisiyalar tələb edən layihədir, bir neçə ölkəni, iki dənizi birləşdirən layihədir. Təbii ki, biz ümid edirik ki, rəhbər komitənin sabahkı ilk iclası da gələcək birgə fəaliyyətlər üçün yol xəritəsi təklif edəcək”, - Əliyev bildirib.
Öz növbəsində Klaus İohannis bildirib ki, Cənubi Qafqaz regionu həm Rumıniya, həm də Avropa İttifaqı üçün böyük əhəmiyyət kəsb edir.
Rumıniya Azərbaycanla strateji tərəfdaşlıq haqqında sənəd imzalayan ilk Aİ üzvüdür. İlham Əliyevin 2022-ci il dekabrın 17-də Buxarestə səfəri zamanı Azərbaycan, Gürcüstan, Rumıniya və Macarıstan hökumətləri arasında yaşıl enerjinin inkişafı və ötürülməsi sahəsində Strateji Tərəfdaşlıq haqqında Saziş imzalanıb.
“Biz ölkələrimiz arasında strateji tərəfdaşlığı dərinləşdirmək və strateji əhəmiyyət kəsb edən regional layihələri həyata keçirmək istəyirik. Biz həmçinin enerji, ticarət, investisiya, rəqəmsallaşma və kənd təsərrüfatı sahələrində əməkdaşlığa hazırıq”, - Yohannes bildirib.
O, Əliyevə təşəkkür edib ki, yanvar ayından Azərbaycan Rumıniyaya əlavə həcmdə qaz nəql etməyə başlayıb.
"Sabah iki ölkənin neft şirkətləri - "Romgaz" və SOCAR arasında yeni saziş imzalanacaq, ona əsasən, 2023-2024-cü illərdə Rumıniyaya əlavə qaz tədarük ediləcək".
Bundan əlavə, Rumıniya və Azərbaycan Avropa, Cənubi Qafqaz və Mərkəzi Asiya arasında nəqliyyat sahəsində əməkdaşlığı inkişaf etdirmək niyyətindədirlər.
“Cənab Əliyevlə müzakirə etdiyimiz son məsələlərdən biri Rusiyanın Ukraynaya təcavüzü və Qara dəniz regionunda vəziyyət olub. Biz belə çətin vəziyyətdə həmrəyliyin vacibliyini vurğuladıq və Azərbaycanın bu məsələlərlə bağlı mövqeyini yüksək qiymətləndirdik”, - Yohannes yekunda bildirib.
Qeyd edək ki, gün ərzində Əliyev Yohanneslə təkbətək və nümayəndə heyətlərinin iştirakı ilə danışıqlar aparıb.
Fevralın 3-də Əliyev və Yohannes Cənub Qaz Dəhlizi üzrə Məşvərət Şurasının iclasında iştirak edəcəklər.
