Məhkəmə-Hüquq Şurasının üzvləri seçilib - Dəyişən nə oldu?
İyunun 21-də Azərbaycan Hakimlərinin Konfransı keçirilib. Ölkənin bütün məhkəmələrini təmsil edən 130 hakimin iştirak etdiyi forumda Məhkəmə-Hüquq Şurasının üzvləri seçilib.
Məhkəmə Hüuq Şurasının məlumatına görə, Ali Məhkəmənin hakimləri - İnam Kərimov, Çingiz Əsgərov, Sənan Hacıyev, apellyasiya instansiya məhkəmələri üzrə hakimlər - Səadət Bəktaşi, Mübariz Əkbərov, Tofiq Paşayev və birinci instansiya məhkəmələri üzrə hakimlər - İsmayıl Xəlilov, Kamran Süleymanov, Toğrul Əliyev Məhkəmə-Hüquq Şurasının üzvü seçilib.
Həmçinin, konfransda hüquq ictimaiyyətinin nümayəndəsi qismində Səfa Mirzəyev şuraya üzv seşilib.
“Məhkəmə-Hüquq Şurası haqqında” Azərbaycanın qanunu məhkəmə sisteminin müstəqilliyinin daha səmərəli şəkildə təmin edilməsi məqsədilə təkmilləşdirilib, Şurada icra hakimiyyəti orqanlarının nümayəndələrinin sayı azaldılmaqla, hakim üzvlərinin sayı artırılıb, habelə hüquqşünas alimin və hüquq ictimaiyyətinin nümayəndəsinin təmsil olunması nəzərdə tutulub.
Eyni zamanda Məhkəmə-Hüquq Şurasının formalaşmasının yeni qaydası, o cümlədən onun hər məhkəmə instansiyasından 3 hakim olmaqla, 9 hakim üzvünün və hüquq ictimaiyyətinin nümayəndəsinin Hakimlərin Konfransı tərəfindən seçilməsi müəyyən olunub.
“Məhkəmə-Hüquq Şurası haqqında” qanuna əsasən Məhkəmə-Hüquq Şurası 15 üzvdən ibarətdir. Bunlardan 3 üzv Ali Məhkəmənin, 3 üzv apellyasiya məhkəmələrinin, 3 üzv birinci insatnsiya məhkəmələrinin hakimləridir, hər birindən bir üzv olmaqla Konstitusiya Məhkəməsi, Milli Məclis, icra hakimiyyəti, Vəkillər Kollegiyası, Milli Elmlər Akademiyası tərəfindən təyin edilir, bir üzv isə hüquq ictimaiyyətinin nümayəndəsidir.
