Blinkenin müşaviri Cənubi Qafqazda - ABŞ-Rusiya savaşı davam edir

ABŞ Dövlət Departamentinin Qafqaz danışıqları üzrə baş müşaviri Lui Bono Vaşinqtonun sülh prosesinə dəstəyini, davamlı sülhə nail olmağın yollarını müzakirə etmək üçün ötən gün Azərbaycana səfər edib.

Səfər zamanı Lui Bono prezident İlham Əliyev və xarici işlər naziri Ceyhun Bayramovun qəbulunda olub.

Görüşlər zamanı Azərbaycan-Ermənistan arasında sülh prosesi, bölgədə cari vəziyyət, Azərbaycanla Ermənistan arasında danışıqların cari vəziyyəti və perspektivləri müzakirə olunub.

Baş müşavir Azərbaycandan sonra Ermənistana da səfər edəcək. O, bundan əvvəl may ayında bölgədə səfərdə olub. Maraqlıdır ki, Lui Bononun səfəri ərəfəsində Rusiya Qərbin vasitəçiliyi ilə keçirilən danışıqları şübhə altına alıb. Rusiya XİN rəsmisi deyib ki, Azərbaycan və Ermənistan arasında tələsik hazırlanmış sülh sazişi regiona davamlı sülh gətirməyəcək.

Regionda vəziyyətin gərginləşdiyi mərhələdə Lui Bono Azərbaycan və Ermənistana niyə gəlib?

Məşhur britaniyalı politoloq Neil Uatson deyib ki, L.Bononun səfəri son dərəcə çox müsbət haldır:

“O, hər iki tərəfin mühüm şəxsləri ilə görüşlər keçirmək üçün həm Ermənistana, həm də Azərbaycana səfər edir. Ermənistan tərəfi üçün əsas məsələ Qarabağda yaşayan ermənilərin iddia edilən problemləridir. O, Qarabağda yaşayan ermənilərin hüquqlarının təmin edilib-edilmədiyini yoxlaya bilər. Bu zaman görəcək ki, Azərbaycan tərəfi həqiqəti bildirir. Görüş Azərbaycan və Ermənistan xarici işlər nazirləri arasında Virciniya və Vaşinqtonda, sonuncuda isə ABŞ dövlət katibi Entoni Blinkenin iştirakı ilə keçirilən görüşlərdən sonra baş tutması da simvolikdir. Fikrimcə, Rusiyanın olmadığı bir şəraitdə ABŞ-ın himayəsi ilə həyata keçirilən diplomatiya Cənubi Qafqazda sülh müqaviləsinə nail olmaq üçün ən çox ehtimal olunan yollardan biridir. Digər yol isə Avropa İttifaqından keçə bilər. Ona görə də düşünürəm ki, bu səfər çox əhəmiyyətli olacaq. Sülh müqaviləsi üçün danışıqların yeni mərhələsi də bu görüşlə müəyyənləşə bilər”.