"Rusiya o günə qalıb ki, Azərbaycana qarşı Surət Hüseynovdan istifadə etsin?"

“Surət Hüseynov artıq vəfat edib. Ona görə də kiminsə hansı iddianı irəli sürməsi doğru deyil”.

Bu sözləri yenisabah.az-a açıqlamasında Milli Məclisin sabiq deputatı Cümşüd Nuriyev deyib.

O, Müasir Müsavat Partiyasının (MMP) sədri Hafiz Hacıyevin “Müsavat TV”nin efirində “qiyamçı polkovnik”lə bağlı səsləndiridyi fikirlərə münasibət bildirib.

Xatırladaq ki, MMP sədri iddia edib ki, S. Hüseynovu Rusiya xüsusi xidmət orqanları zəhərləyərək öldürüb.

C.Nuriyev isə söyləyib ki, S. Hüseynovun Azərbaycana qarşı hansısa bir addım atacağına inanmır:

“Bu versiyanın o hissəsində bəlkə də haqlıdırlar ki, o xalqını, millətini və dövlətini sevən bir adam idi. Mən Surəti 35 ilə yaxındır ki, tanıyırdım. Ona görə də bu iddialar inandırıcı deyil. Axı Rusiyanın Surət Hüseynova da elə bir ehtiyacı yox idi? Çünki Rusiyanın Azərbaycanla münasibətləri yaxşı idi. Ona görə ki, biz strateji əməkdaş və tərəfdaşıq. Təbii ki, hərbi elitada Kremlin Qarabağla bağlı maraqları var, bunu heç kim gizlətmir. Amma Rusiya o günə qalıb ki, Azərbaycana qarşı Surət Hüseynovdan istifadə etsin?!”

Onun fikrincə, nə S. Hüseynov xalqın əleyhinə gedərdi, nə də Rusiya belə bir variantı seçərdi:

“Bu, bizimkilərin düşünüb tapdığı bir yalandır. Bəzi adamlar var ki, qaşınmayan yerdən qan çıxarmağa çalışırlar. Adam artıq dünyasını dəyişib. Ya vəlvələdən, ya da zəlzələdən bu, olub. Qurani-Kərimin Bəqərə surəsində deyilir ki, “ölüm bir saniyə nə gec, nə də tez gəlir”. Hamı eyni cür ölsəydi, dünyada yaşamağın mənası olmazdı ki? İnsanlar müxtəlif cür ölür, amma dünyasını dəyişən adam haqqında bu fikirləri yaymaq nə dərəcədə düzgündür? Belə şeylər ayıbdır. Adam dünyasını dəyişəndən sonra onun haqqında danışmazlar. Dində də bu düzgün deyil”.

“Surət Hüseynov dünyasını dəyişsə də, onun nəyinsə qurbanı olduğunu dilə gətirməkdə məqsəd nədir? Həm onu pisləyirlər ki, guya bu adam Azərbaycan əleyhinə işləmək istəməyib deyə Rusiya onu zəhərləyib. Vallah, ayıbdır, olmaz belə demək. Bu millət düzələn deyil”, – o, fikirlərini tamamlayıb.