"BMT qətnamə qəbul etsəydi, hərbi təxribat baş verəcəkdi" - Zərdüşt Əlizadə

“Məlum olduğu kimi, avqustun 16-da Nyu-Yorkda BMT Təhlükəsizlik Şurasında guya Azərbaycanın Qarabağ bölgəsində yaranmış “humanitar böhran”ın müzakirəsinə dair təcili iclası keçirildi. Erməni lobbisi bu toplantı ilə əlaqədar bütün gücünü ortaya qoymuşdu. Ermənistan BMT Təhlükəsizlık Şurasında Azərbaycana qarşı qətnamə qəbul ediləcəyini gözləyir və bundan sonra hərbi təxirbatalara başlamağı planlaşdırırdı. Ancaq bu, olmadı. Azərbaycan əleyhinə heç bir qətnamə qəbul olunmadı. Ermənilərin bu arzusu gözündə qaldı”.

Bunu bakupost.az -a politoloq Zərdüşt Əlizadə deyib.

O bildirib ki, Azərbaycan beynəlxalq hüquq çərçivəsində davranır:

"Heç kim Azərbaycana deyə bilməz ki, sən öz ərazilərində suveren hüquqlarını həyata keçirmə, yaxud qanunsuz hərbi birləşmələri öz ərazində saxla. ​ Azərbaycanın mövqeyi elədir ki, heç kim ona nəsə deyə bilməz. Ermənistan şüvən qopardı ki, BMT Təhlükəsizlik Şurası Azərbaycana qarşı qətnamə qəbul etsin. Şura bu qətnaməni qəbul edə bilməzdi. Çünki orada ziddiyyətlər kifayət qədər kəskindir".

Z.Əlizadə qeyd edib ki, Ermənistanın humanitar məsələ kimi təqdim etməyə çalışdığı məsələ əslində Azərbaycanın suverenliyi və ərazi bütövlüyünə zərbə vurmaq məqsədilə aparılan təxribatçı siyasi kampaniyadır:

"Əgər Azərbaycan əleyhinə qətnamə qəbul edilsəydi, bu, beynəlxalq hüquqa qarşı olardı. Çünki Qarabağda yaşayan erməni sakinlər blokdada deyil. Sərbəst və rahat şəkildə hərəkət edə bilirlər. İkincisi, həmin qətnamə qəbul edilsəydi belə, bu, heç nəyi dəyişməyəcəkdi. BMT-nin bundan əvvəl Azərbaycan ərazilərinin işğal edilməsi ilə bağlı 4 qətnaməsi vardı. Nə oldu? Ermənistan Azərbaycandan qat-qat zəif dövlətdir. Biz heç bir qətnaməyə məhəl qoymadan öz siyasətimizi yürüdəcəkdik”.