Ermənilər mülki təyyarələrin naviqasiya sistemləri üçün yenə radiomaneə törədir
Sentyabrın 18-də Tbilisi-Bakı marşrutu üzrə uçuş yerinə yetirən Azərbaycan Hava Yollarının E-190 tipli sərnişin təyyarəsinə saat 20:28-dən 20:34-dək radiomaneələrin tətbiqi nəticəsində GPS peyk naviqasiya sistemlərində fasilə yaranıb.
Bu barədə Azərbaycan Müdafiə Nazirliyinin mətbuat xidməti məlumat yayıb.
Müdafiə Nazirliyi bildirir ki, Azərbaycanın hava məkanından istifadə etməklə uçuşlar yerinə yetirən aviaşirkətlərin sərnişin təyyarələrinin GPS peyk naviqasiya sistemlərinə qarşı radiomaneələr Rusiya sülhməramlı kontingentinin müvəqqəti yerləşdirildiyi ərazilərdəki qeyri-qanuni erməni silahlı dəstələri tərəfindən tətbiq edilir.
Müdafiə Nazirliyi bundan öncə də dəfələrlə sərnişin təyyarələrinnin GPS peyk naviqasiya sistemlərinə qarşı radiomaneələr törədilməsi barədə məlumatlar yayıb.
