"ABŞ nüvə sınağı keçirsə, Rusiya da eyni cavabı verəcək" - Sergey Ryabkov
Rusiya Nevada ştatında poliqonda baş vermiş yeraltı partlayışla bağlı məlumatları araşdırır.
TASS xəbər verir ki, bu barədə Rusiya Federasiyası xarici işlər nazirinin müavini Sergey Ryabkovun nazirliyin saytında dərc olunmuş şərhində deyilir.
“Biz vəziyyəti izləməyə davam edirik və Rusiya Prezidentiin 21 fevral 2023-cü il tarixində Rusiya Federasiyası Federal Məclisinə müraciətində dediyi sözləri xatırladırıq: “Əlbəttə ki, biz bunu ilk etməyəcəyik, amma ABŞ nüvə sınaqları keçirsə, biz də bunu keçirəcəyik”, - deyə o bildirib.
Qeyd edək ki, oktyabrın 18-də ABŞ Energetika Departamenti ABŞ-ın bütün dünyada aşağı rentabelli nüvə partlayışlarını aşkar etmək qabiliyyətini yaxşılaşdırmaq üçün Nevada ştatında yeraltı kimyəvi partlayışın həyata keçirildiyini bildirib.
Digər tərəfdən, Rusiya Xarici İşlər Nazirliyinin Silahların Yayılmaması və Silahlara Nəzarət Departamentinin direktoru Vladimir Yermakov da Rusiyanın ABŞ-ın nüvə sınağı keçirmək ideyasından əl çəkmədiyinə inandığını vurğulayıb. “Vaşinqton Nevadadakı nüvə poliqonunu yüksək hazırlıq vəziyyətində saxlamağa davam edir. Biz inanırıq ki, amerikalılar öz nüvə arsenallarının modernləşdirilməsi çərçivəsində nüvə sınaqları keçirmək fikrindən əl çəkmirlər”, - diplomat bildirib.
