"Türkiyə və Azərbaycanla münasibətlərə diqqət yetirməliyik" - Nikol Paşinyan

“Ermənistanın qarşısında duran əsas vəzifə regionda uzunmüddətli sülhə nail olmaqdır, Qərbdən hərbi bazalar açmağı, silah-sursatla təmin etməyi tələb etmək deyil”.

Bunu Ermənistanın Baş naziri Nikol Paşinyan “The Wall Street Journal”a müsahibəsində deyib.

Paşinyan Ermənistan və Rusiya arasındakı tarixi əlaqələr barədə suala cavab olaraq, ilk növbədə, Türkiyə və Azərbaycanla münasibətlərə diqqət yetirməyə çağırıb:

“Bütün suallar və onlara cavablar buradadır. Biz ilk növbədə regionda münasibətləri yaxşılaşdırmaq üçün çalışmalıyıq”.

O qeyd edib ki, yaxın aylarda Azərbaycanla sülh sazişinin imzalanmasının mümkünlüyünə nikbin yanaşır:

“Regionun gələcəyi uzun illərdir bağlı olan sərhədlərin və ticarət yollarının, o cümlədən Ermənistanın suverenliyinə hörmət şərti ilə Azərbaycan və Türkiyə arasında Ermənistan vasitəsilə quru əlaqəsinin açılmasındadır. Təhlükəsizliyə təkcə ordunun köməyi ilə deyil, həm də regionda sülhün bərqərar olması ilə nail olmaq olar”.