Qəzzada atəşkəsin sonuncu günü - Döyüşlər bərpa edilir?
Qəzza zolağında atəşkəsin altıncı və sonuncu günüdür. Atəşkəs müddətinin yenidən uzadılması gözlənilir.
Bu gün HƏMAS və İsrailin növbəti dəfə girov və məhbusları azad edəcəyi gözlənilir. İsrail mediası baş nazirin ofisinə istinadən yazıb ki, hökumət HƏMAS tərəfindən azad ediləcəyi gözlənilən girovların siyahısını alıb.
İsrail bildirib ki, HƏMAS hər gün ən azı 10 israilli girovu azad etməyə davam edərsə, atəşkəs daha da uzadıla bilər. Lakin HƏMAS sadəcə uşaq və qadınları sərbəst buraxdığı üçün atəşkəsin tezliklə bitəcəyi və ya kişilər üçün xüsusi razılaşma əldə ediləcəyi gözlənilir. Müşahidəçilər kişilər üçün danışıqların daha çətin olacağını düşünür.
HƏMAS dünən 12 girovu azad edib, bununla da atəşkəsin başladığı cümə günündən bəri azad edilənlərin sayı 81-ə çatıb. Bunlar əsasən İsrailli qadın və uşaqlar, xarici vətəndaşlar olub. Dünən azad edilən şəxslərin 10-u israilli qadın, ikisi Tailand vətəndaşıdır. 17-84 yaşlarında olan şəxslər arasında ana-qız cütlüyünün də olduğu bildirilir. Onların hamısı ilkin tibbi müayinədən keçdikdən sonra ailələri ilə görüşmək üçün İsrail xəstəxanalarına aparılıb.
Qısa müddətdən sonra İsrail İordan çayının qərb sahilindəki Ofer və Qüds həbsxanalarından 30 fələstinlini azad edib. Fələstinli Məhbuslar Klubu azad edilənlərin, yarısının qadın, qalanının isə yeniyetmə kişi olduğunu bildirib. Bununla da atəşkəs çərçivəsində azad edilən fələstinlilərin ümumi sayı 180-ə çatıb.
Qeyd edək ki, HƏMAS-ın nəzarətində 240 girovun olduğu bildirilir. Oktyabrın 7-də başlayan toqquşmada 1200 israilli, 15 mindən çox fələstinli həlak olub.
HƏMAS və İsrail arasında danışıqlara vasitəçilik edən Qətər rəsmiləri dünən İsrailin MOSSAD kəşfiyyat qurumunun və ABŞ Mərkəzi Kəşfiyyat İdarəsinin rəisləri ilə görüşüb. Rəsmilər atəşkəs razılaşmasının yeni mərhələsinin mümkün parametrlərini müzakirə ediblər. HƏMAS-ın yalnız qadın və uşaqları deyil, kişi və ya hərbçi olan girovları da sərbəst buraxması müzakirə olunur. Onlar, həmçinin daha uzun müddət davam edən atəşkəsə nail olmaq üçün nəyin lazım ola biləcəyini də nəzərdən keçiriblər.
Qətər rəsmiləri bu görüşdən əvvəl HƏMAS ilə danışıqlar aparıb. Yerli mətbuatın məlumatına görə, israillilər və HƏMAS görüşdə gündəmə gətirilən ideyaları daxildə müzakirə edirlər.
Atəşkəs barədə beynəlxalq çağırışlar da artmaqdadır. G7 ölkələrinin xarici işlər nazirləri çərşənbə axşamı yaydıqları birgə bəyanatda atəşkəsin uzadılmasına və daha çox humanitar yardımaş göstərilməsinə çağırıblar.
Qəzzada 159-a yaxın girov qalıb. Ağ Ev çərşənbə axşamı bildirib ki, səkkiz-doqquz amerikalı hələ də HƏMAS-ın əlindədir. ABŞ-ın milli təhlükəsizlik şurasının sözçüsü Con Kirbi bildirib ki, Vaşinqton HƏMAS-ın daha çox amerikalını azad edəcəyinə ümid edir və ABŞ hökuməti Qətərlə döyüşlərdə fasilə müddətini uzatmaq üçün işləyəcək.
