Deputat ABŞ-ın Azərbaycanda dini tolerantlığın qiymətləndirilməsi ilə razı deyil
ABŞ Azərbaycanı dini azadlıqların ciddi pozuntusuna yol verən ölkələrin xüsusi siyahısına salıb. Bu, potensial olaraq ABŞ hökuməti tərəfindən sanksiyalar üçün yol açır.
Siyahıya ötən ildən qalan 12 ölkələrlə yanaşı Əlcəzair, Azərbaycan, Mərkəz Afrika Respublikası, Komor Adaları və Vyetnam da daxil edilib.
"Hökumətlər dini azlıqların icmalarına və ziyarətgahlarına hücumlara, fikirlərin dinc şəkildə ifadəsinə görə həbslərə, transmilli repressiyalara və dini icmalara qarşı zorakılıq çağırışlarına son qoymalıdırlar", deyə hesabatı açıqlayan dövlət katibi Blinken qeyd edib.
Amerikanın dini etiqad azadlığı üzrə qurumu - USCIRF isə ötən ay açıqladığı hesabatda deyilir ki, son üç ildə Azərbaycan hökuməti din haqqında qanuna iki dəfə düzəliş edərək, müxtəlif növ dini fəaliyyətlərə yeni məhdudiyyətlər gətirib.
Məruzədə həmçinin Dağlıq Qarabağdakı dini obyektlərlə bağlı narahatlıq ifadə olunur.
Milli Məclisin İctimai birliklər və dini qurumlar komitəsinin üzvü Ceyhun Məmmədov isə Turana bildirib ki, hər zaman olduğu kimi yenə ABŞ öz qərəzli münasibətini ortaya qoyub: "30 il ərzində Qarabağda bütün məscidlərimiz, Alban kilsələrimiz, xristian məbədlər barbarcasına dağıdıldı, içərisində donuz, inək saxlanıldı və bu günə kimi Amerika heç bir reaksiya vermədi".
Qarabağda erməni abidələrinə gəldikdə isə deputat qeyd edib ki, bu abidələrin hamısı Azərbaycan tərəfindən qorunur: "Bir dənə fakt göstərilə bilməz ki, hansısa tarixi abidəni Azərbaycan ordusu dağıdıb. Amma bu gün burada ən qərəzli məsələ odur ki, indiki Ermənistanın ərazisində 300 bizim məscid, 500 qəbristanlıq dağıdılıb, İrəvanda yerləşən və Azərbaycan məscidi olan Göy Məscidi Ermənistan tərəfindən fars məscidi kimi təqdim olunur. ABŞ-ın buna susması bir daha ikili standartların olmasını göstərir".
C.Məmmədovun sözlərinə görə, bu gün Bakının mərkəzində erməni kilsəsi var və onun içərisində erməni dilində 5 min ədəbiyyat qorunur: "Bütün bunlar onu göstərir ki, Azərbaycanda bununla bağlı heç bir problem yoxdur, ABŞ rəsmilərinin verdiyi açıqlamalar da heç bir fakta əsaslanmır. Son illər Azərbaycanda bütün dinlərə, təriqətlərə daha geniş imkanlar və bütün şəraitlər yaradılıb, hər il dövlət büdcəsindən yardımlar ayrılır".
C.Məmmədov vurğulayıb ki, Qarabağda erməni kilsəsi dövlət büdcəsi hesabına təmir olunur: "O anlamda narahatlıq üçün heç bir əsas yoxdur".
