İsrail geri çəkilir...

"İsrail HƏMAS-ı tamamilə məhv etmək planlarından imtina edir və qüvvələrini israilli girovları azad etməyə yönəldir".

CNN telekanalına müsahibə verən ekspertlər bu qənaətə gəliblər.

Britaniya Kral Beynəlxalq Münasibətlər İnstitutunun Yaxın Şərq və Şimali Afrika üzrə elmi işçisi Bilal Saab İsrailin HƏMAS-ı tamamilə məhv etmək niyyətini əlçatmaz məqsəd adlandırıb: “İsrail Müdafiə Qüvvələrinin rəhbərliyi çox yaxşı başa düşür ki, onların edə biləcəyi ən çox şey HƏMAS-ın hərbi imkanlarını ciddi şəkildə zəiflətməkdir”.

O, zamanla yarışın olduğunu vurğulayıb. Saabın sözlərinə görə, İsrailin artan beynəlxalq reaksiya doğurmadan nə qədər müharibə apara biləcəyi bəlli deyil. Tədqiqatçının fikrincə, İsrailin HƏMAS-ın rəhbərliyini məhv etmək niyyəti nəzərəçarpacaq nəticə verməyəcək, çünki belə təşkilatlar komandirləri asanlıqla əvəz edir.

İsrail Demokratiya İnstitutunun rəhbəri və Knessetin “Kadima” partiyasından keçmiş üzvü Yohanan Plesner qeyd edib ki, israilli girovların HƏMAS-ın əlində qalması İsrailin baş naziri Binyamin Netanyahuya güclü siyasi təzyiqlərə səbəb olur: "Qəzza zolağında müharibə başlayandan bəri baş nazirin ölkədəki reytinqi xeyli aşağı düşüb".