"Rusiya sülhün əldə olunmasında kömək etməyə hazırdır" - İrəvandakı səfir

Rusiyanın Ermənistandakı səfiri Sergey Kopırkin RİA-ya müsahibəsində maraqlı məqamlara toxunub.

Onun sözlərinə görə, bu il Ermənistan Avrasiya İqtisadi Şurasına sədrlik edir. Bu, nümayəndə heyətlərinin mübadiləsini və səfərləri nəzərdə tutur.

"Bir ay əvvəl İrəvanda ölkələrimizin baş nazir müavinlərinin rəhbərlik etdiyi İqtisadi Əməkdaşlıq üzrə Hökumətlərarası Komissiyanın növbəti iclası keçirilib. Orada həm Rusiyanın, həm də Ermənistanın müxtəlif departamentlərinin yüksək vəzifəli nümayəndələri iştirak ediblər. Bu, ikitərəfli münasibətlərdə çox mühüm, əlamətdar hadisə idi", - səfir deyib.

Kopırkin əlavə edib ki, Rusiya Ermənistanla Azərbaycan arasında sülhün əldə olunmasına maksimum köməklik göstərməyə hazırdır:

"Rusiya istər sülh müqaviləsinin bağlanması, istər Ermənistanla Azərbaycan arasında sərhədin delimitasiyası, istər demarkasiyası, istər etimad quruculuğu tədbirlərinin, o cümlədən vətəndaş cəmiyyəti vasitəsilə təmasların inkişafı olsun, bütün aspektlər üzərində işləməyə hazır olduğunu həmişə vurğulayır. Cənubi Qafqaz bizim üçün çox vacib regiondur və onun dinc, sabit və firavan olması bizim həyati maraqlarımıza uyğundur", - diplomat belə söyləyib.