Ceyhun Bayramov Azərbaycanın İİR-dəki səfirliyinin fəaliyyətinin bərpa olunması üçün şərtləri açıqlayıb
Diplomatik missiyaya qarşı terror aktının təhqiqatının başa çatması təmin edilərsə və onun fəaliyyətinin təhlükəsizliyinə zəmanət verilərsə, Azərbaycan İrandakı səfirliyinin fəaliyyətini bərpa edəcək. Bu barədə bu gün jurnalistlərə Azərbaycan XİN başçısı Ceyhun Bayramov bildirib.
Azərbaycanın Tehrandakı səfirliyinin mühafizə xidmətinin əməkdaşı Orxan Əsgərovun diplomatik missiyaya silahlı hücum nəticəsində həlak olmasının ildönümü münasibətilə bu gün nazir onun qəbrini ziyarət edib.
Bayramov qeyd edib ki, səfirliyin işinin bərpa olunması üçün iki şərtə riayət olunmalıdır.
"Birinci məqam terror aktı faktı ilə bağlı təhqiqatın başa çatması və hökm çıxarılmasıdır. İkincisi - səfirliyimizin təhlükəsizliyinə tam zəmanət verilməlidir və biz bundan əmin olmalıyıq", deyə nazir vurğulayıb.
27 yanvar 2023-cü il tarixində Azərbaycanın İrandakı səfirliyinə silahlı hücum törədilib. Hadisə zamanı mühafizə xidmətinin bir əməkdaşı həlak olub, iki nəfər yaralanıb.
Yaralılardan biri hücum edən şəxsi səfirlik binasından çıxarmağa müvəffəq olub. O, binadan kənarda da bir müddət diplomatik missiyanı təhdid etməkdə davam edib. Bütün bunlar baş verərkən İranın güc qurumları tamamilə hərəkətsiz qalıb. İran hakimiyyəti cinayətin səbəblərini "şəxsi motivlər" kimi qələmə verməyə çalışıb, Azərbaycanda hücum terror aktı kimi qiymətləndirilib.
Diplomatların, digər işçilərin və onların ailə üzvlərinin həyat təhlükəsizliyi olmadığına görə Azərbaycan onları təxliyə edib və səfirliyin fəaliyyətini dayandırıb.
Bir müddət əvvəl Azərbaycan XİN bu gün İranda səfirliyə hücum haqqında iş üzrə məhkəmənin birinci iclasının başladığı haqqında məlumat yayıb.
