Bu üç dövlət müharibənin yenidən başlamasını istəyir
Ötən gün Ermənistan azaraq sərhədi keçən əsgərimiz Ruslan Pənahovu Azərbaycana qaytarıb. Rəsmi İrəvanın əsgərimizdən Bakıda həbsdə olan ermənilərin geri verilməsi üçün istifadə edəcəyi və onun bir neçə maddə üzrə ittiham ediləcəyi haqda xəbərlər var idi. Lakin Ermənistan tərəfi cinayət işi açmaqdan imtina etdi və əsgərimizin təhvil verilməsini “xoşməramlı jest” adlandırdı.
Bəs görəsən Ermənistan tərəfinin bu addımı tam olaraq nədən xəbər verir?
Mövzu ilə bağlı yenisabah.az-a danışan politoloq Zərdüşt Əlizadə bildirib ki, İrəvanın bu addımı sülh danışıqları baxımından olduqca təqdirəlayiqdir:
“Rəsmi İrəvanın bu addımını olduqca müsbət qiymətləndirirəm. Əsgərimizin Azərbaycana təhvil verilməsi sülhün təmin olunmasında olduqca təqdirəlayiq addımdır. Bu onu göstərir ki, Ermənistan həqiqətən Azərbaycanla sülhün bərpa olunmasında maraqlıdır. Buna bənzər bir addım bizim tərəfdən də atılmışdı. Azərbaycan tərəfi bəyan etmişdi ki, əgər qarşı tərəfdən atəş açılsa və nəticədə heç bir insana ziyan dəyməsə onda cavab atəşi açılmayacaq. Həyatda hər şey ola bilər, hansısa əsgərin təsadüfən güllə atmasına sərt cavab vermək lazım deyil. Həm Azərbaycan, həm də Ermənistan artıq şüurlu şəkildə ədavət həddini yüksəltmir. Bu yaxşı əlamətdir və belə davam edərsə, sülh müqaviləsi ilə bağlı nələrəsə ümid etmək olar”.
Politoloq bildirib ki, Ermənistanın daxilində və xaricdə bəzi qüvvələr var ki, onlar Azərbaycanla sülhün bərpa olunmasında maraqlı deyillər:
“İlk növbədə Ermənistanda bəzi qüvvələr və ictimai qruplar var ki, onlar Azərbaycanla sülh müqaviləsinin imzalanmasında maraqlı deyil. İndiyə qədər iki ölkə arasında davam edən ədavətdən istifadə edən bu qüvvələr hakimiyyətdə olublar və yaxşı pullar qazanıblar. Digər tərəfdən, bəzi xarici qüvvələr var ki, onlara şərti olaraq vasitəçi olmasalar da, faktiki olaraq sülhün bərpa olunmasında maraqlı deyillər. Bunlar başlıca olaraq Rusiya, Fransa və ABŞ-dır. Bu qüvvələr istəyir ki, iki ölkə bir-biri ilə dalaşsın, vuruşsun və onlar da təpiklə qapılarımızı açıb desinlər ki, biz sizin müharibə etmənizə icazə vermərik. Bunun hesabına bu cür qüvvələr öz diktələrini hər iki ölkəyə rahatlıqla yeridə biləcək. Kənar qüvvələr belə çirkin oyunlarla münaqişənin tamamilə bitməsini istəmir”.
