Gürcüstanda kəskin dəyişiklik - Rəsmiləşdi, sabahdan başlayır

Gürcüstan Prezidenti Salome Zurabişvili veto qoyduqdan sonra parlamentin sədri Şalva Papuaşvili “Xarici təsirin şəffaflığı haqqında” qanun layihəsini imzalayıb.

Qanun iyunun 4-dən qüvvəyə minəcək.

“Bu gün “Xarici təsirin şəffaflığı” aktını imzaladım. Qanunun əsas məqsədi Gürcüstanın siyasi, iqtisadi və sosial sistemlərinin xarici müdaxilələrə qarşı sabitliyini gücləndirməkdir”, - spiker bildirib.

Onun sözlərinə görə, iyunun 4-dən etibarən 60 gün müddətində Ədliyyə Nazirliyi bütün qanunvericilik aktlarının icrasını həyata keçirəcək, həmçinin təşkilatlar üçün elektron portal yaradacaq: “60 gündən sonra ciddi xarici maliyyəsi olan bütün təşkilatlar portalda qeydiyyatdan keçməlidir. Qanun sabah qüvvəyə minir, amma sabahdan başlayaraq qeydiyyatdan keçmələri üçün 60 günü var”.

Prezident mayın 18-də 84 deputatın üçüncü oxunuşda qəbul etdiyi qanun layihəsinə veto qoyub. Qərbdə parlamentarilərin bu addımı sərt tənqidə səbəb olub. Hətta Almaniya səfiri Peter Fişer bəyan edib ki, bu qanun qüvvədə olduğu müddətdə Gürcüstanla Avropa Birliyi arasında üzvlüklə bağlı danışıqlar başlamayacaq.

ABŞ Dövlət Departamenti mayın 24-də Vaşinqtonun Tiflislə əməkdaşlığın bütün sahələrini nəzərdən keçirəcəyi barədə məlumat yayıb. Bəyanatda qanunun qəbulunda iştirak etmiş keçmiş və indiki siyasətçilər (həmçinin onların ailə üzvləri) üçün viza məhdudiyyətinin tətbiqi də qeyd olunub. Sanksiyalar həmçinin Tiflisdə dinc nümayişlərin dağıdılmasında iştirak edən orqanlarına da şamil ediləcək.

Hakim “Gürcü Arzusu” Partiyası ABŞ-nin qərarını “qeyri-məhsuldar və görünməmiş” adlandırıb.

Baş verənlərin fonunda Rusiyadan Gürcüstan hakimiyyətinin ardıcıl mövqeyi ilə bağlı dəstək sözləri eşidilir, Qərbin bu ölkəyə qarşı ikili standartları vurğulanır.