Azərbaycan diplomatı və xanımı qarət olundu - 90 minlik saat...

Azərbaycan Respublikasının NATO yanında nümayəndəliyinin başçısı Cəfər Hüseynzadə və həyat yoldaşı Brüsseldə quldurluğun qurbanı olub.

Bu barədə Belçikanın "Het Nieuwsblad" nəşri məlumat yayıb.

Bildirilir ki, azərbaycanlı diplomat xanımı ilə icarəyə götürdüyü skuterdə olan zaman iki nəfər şəxs revolverin qundağı ilə onların başına vurub. Daha sonra diplomata və xanımına məxsus 90 min avro dəyərində iki ədəd “Rolex” saatını oğurlayıblar.

Nəşr yazır ki, hadisə bazar ertəsi günorta saat 15:30-dan bir qədər əvvəl Brüsselin Luiza prospektində baş verib.

Hücuma məruz qalan şəxslər müayinə olunmaq üçün xəstəxanaya aparılıb. Brüssel dövlət prokurorluğu araşdırmanın aparıldığını təsdiqləsə də, əlavə şərh verməkdən imtina edib. 

Qeyd edək ki, Cəfər Hüseynzadə 2022-ci ilin oktyabrında  Azərbaycan Respublikasının NATO yanında Nümayəndəliyinin başçısı təyin edilib.