Türkiyəyə çatası 2 milyard dollar ABŞ-da donduruldu - "Wall Street Journal"
Rusiyanın Türkiyədə inşa olunan "Akkuyu" Atom Elektrik Stansiyası üçün nəzərdə tutulan 2 milyard dolları ABŞ-da "JPMorgan" bankında bloklanıb.
"Wall Street Journal" xəbər verir ki, "Qazprombank"a qarşı tətbiq olunan sanksiyalar nəticəsində dondurulan vəsait Rusiyanın AES tikintisi üçün Türkiyəyə ayırdığı 9 milyard dollarlıq kreditin bir hissəsidir.
Digər Rusiya bankları daha əvvəl sanksiya siyahısına salındığı üçün vəsaitin ötürülməsi "Qazprombank" vasitəsilə həyata keçirilirdi.
WSJ-nin yazdığına görə, pullar "Ziraat Bank"da hesabı olan Rusiya şirkətlərinin hesablarına köçürülməli idi.
Amerika mənbələrinin məlumatına görə, 2022-ci ilin yayında "Qazprombank" Citi vasitəsilə AES-in "Ziraat Bank"dakı hesablarına 3 milyard dollar köçürüb. Eyni zamanda "JPMorgan" vasitəsilə 2 milyard dollardan bir qədər çox transfer həyata keçirilib.
Bununla belə, "JPMorgan" vasitəsilə sonradan 2 milyard dollarlıq köçürmə ABŞ Ədliyyə Nazirliyi tərəfindən bloklanıb.
Qeyd edək ki, Almaniyanın "Siemens" şirkəti sanksiyalara görə "Akkuyu" AES üçün sifariş olunan avadanlıqları tədarük edə bilmir. Ötən ilin payızında məlum oldu ki, Rusiya və Türkiyə həmin avadanlıqları Çindən tədarük etməklə bağlı razılığa gəlib.
