ABŞ Çinlə "müharibə"də uduzur
ABŞ və Çin arasında "ticarət müharibəsi" davam edir. Aprelin 10-da ABŞ bütün Çin məhsullarına tətbiq olunan gömrük rüsumlarını 125%-dən 145%-ə yüksəldib. Buna cavab olaraq Çin ertəsi gün ABŞ mallarına olan rüsumları 84%-dən 125%-ə qədər artırıb.
ABŞ-ın ticarət naziri Hovard Latnik bildirib ki, Vaşinqton Pekinlə ticarət münasibətləri barədə "yumşaq dialoq" aparmağa başlayıb. Bu danışıqların vasitəçilər üzərindən həyata keçirildiyi qeyd olunub.
Daha sonra Tramp geri addım atıb. ABŞ administrasiyası elektronika, o cümlədən smartfon və kompüterləri qarşılıqlı rüsumlardan azad etmək qərarına gəlib. "Bloomberg" yazır ki, bu qərar “istehlakçılar üçün qiymət şokunu potensial olaraq yumşaldacaq” və həmçinin "Apple" və "Samsung" kimi böyük korporasiyaların xeyrinə ola bilər. Güzəştlər, həmçinin noutbuklar, sərt disklər, kompüter prosessorları və çiplər üçün nəzərdə tutulub.
Qərbdə bir çox ekspert ABŞ-nin "ticarət müharibəsi"ndə uduzacağını düşünür.
Çin iqtisadiyyatını araşdıran "Dragonomics" şirkətinin tədqiqatlar direktoru Artur Kreber "Financial Times" nəşrində dərc olunan məqaləsində bildirib ko, Trampın Çinə qarşı başladığı "ticarət müharibəsi" uğursuzluqla nəticələnəcək.
Onun fikrincə, Trampın təşəbbüs etdiyi bu mübarizənin uğursuzluğa düçar olacağına dair üç əsas səbəb var.
Birinci səbəb: ABŞ-ın etibarsız imici
Kreberə görə, hazırkı şəraitdə dünyanın əksər ölkələri anlayır ki, Donald Tramp hakimiyyətdə olduğu müddətdə ABŞ beynəlxalq arenada etibarlı tərəfdaş deyil. “Heç bir sağlam düşüncəli lider Çin əleyhinə aparılan bu xaç yürüşündə Trampa qoşulmaq istəməz”, – deyə ekspert vurğulayır. Bu isə Vaşinqtonun müttəfiqlərdən məhrum olması deməkdir.
İkinci səbəb: ABŞ-ın "utanverici" geri addımı
Məqalədə bildirilir ki, Tramp administrasiyası tarifləri artırmaq niyyətində olsa da, maliyyə bazarlarının kəskin reaksiyası bu planlardan geri çəkilməyə vadar edib. Kreber bu addımı “ABŞ-ın qarşılıqlı tarif siyasətindən utanverici şəkildə geri çəkilməsi” kimi dəyərləndirir və qeyd edir ki, belə qərarlar Trampın mövqeyini zəiflədir.
Üçüncü səbəb: Çin iqtisadiyyatının dayanıqlılığı
Ekspertə görə, Çin hakimiyyəti uzunmüddətli iqtisadi mübarizəyə hazırdır. Trampın tarif artımları nəticəsində ABŞ bazarında Çinə olan tələbat azalsa da, Çin bunu daxili istehlakla kompensasiya edə bilər. “Çin artıq ABŞ-dan idxala ehtiyac duymur. Beşillik ixrac nəzarəti proqramı sayəsində o, ABŞ texnologiyasından asılı olmayan məhsullar istehsal etməyi öyrənib”, - Kreber əlavə edib.
