İsrailin İrana hücumu nəticəsində kimlər ölüb?

İranın nüvə proqramına qarşı yönəlmiş “Aslan Milləti” (Am Kelavi) əməliyyatı çərçivəsində  İran Silahlı Qüvvələrinin Baş Qərargah rəisi, general-leytenant Məhəmməd Baqiri və İslam İnqilabı Keşikçiləri Korpusunun (SEPAH) komandiri Hüseyin Salami öldürülüb.

İRNA agentliyi xəbər verir ki,  hücumundan sonra onlarla yanaşı bir sıra hərbi komandirlər, elm adamları, həmçinin mülki şəxslər də həlak olublar.

Belə ki, hava zərbələri nəticəsində İranın nüvə alimləri Məhəmməd Mehdi Tehrançı və Fereydun Abbasi həlak olub.

Agentiyin məlumatına görə, İsrailin İran ərazisinə endirdiyi hava zərbələri nəticəsində SEPAH generalı Hatəm əl-Ənbiya mərkəzi qərargahının komandiri Qulaməli Rəşid də öldürülüb.

Məlumata görə, İran Ali Rəhbəri Seyid Əli Xameneinin müşaviri Əli Şəmxani də zərbələr nəticəsində dünyasını dəyişib.

İsrailin İrana hücumu nəticəsində mülki şəxslər arasında ən azı 5 nəfər ölüb, 20 nəfər yaralanıb. Zərərçəkənlərin Tehranda zədələnmiş binadan çıxarıldığı qeyd edilir.