26 ölkə Ukraynaya ordu göndərməyə razılaşdı - Təhlükəsizlik paketi razılaşdırılıb, ABŞ-nin rəyi gözlənilir
Fransa Prezidenti Emmanuel Makron Parisdə “istəklilərin koalisiyası” formatında keçirilən görüşdən sonra açıqlama verib. O bildirib ki, ABŞ-nin Ukraynaya təhlükəsizlik zəmanətlərinə dair dəstəyinin son forması yaxın günlərdə müəyyən ediləcək.
Makronun sözlərinə görə, sammit iştirakçıları ABŞ Prezidenti Donald Trampla da telefon əlaqəsi saxlayıblar: “Bu danışığın nəticələri aydındır: yaxın günlərdə ABŞ-nin dəstəyinin və təhlükəsizlik zəmanətlərinin yekun forması müəyyən ediləcək. ABŞ bu prosesin hər mərhələsində iştirak edib”.
Makron post-müharibə dövründə Ukrayna ərazisinə qoşunların göndərilməsi ehtimalına da toxunub. O bildirib ki, “istəklilərin koalisiyası”na daxil olan 26 ölkə bu addıma hazırdır. Lakin “Financial Times” yazır ki, bir çox Avropa dövlətləri bu qərarla bağlı hələlik yekun mövqe tutmayıblar. Makron vurğulayıb ki, növbəti mərhələdə ABŞ və Rusiya rəsmiləri arasında təmaslar gözlənilir. Əgər Moskva sülh danışıqlarından imtina etsə, Avropa ilə razılaşdırılmış şəkildə Rusiyaya qarşı yeni sanksiyalar tətbiq olunacaq.
Finlandiya Prezidenti Aleksandr Stubb açıqlayıb ki, Donald Tramp Avropa liderləri ilə söhbətində Rusiyaya qarşı yeni sanksiyaların koordinasiyalı şəkildə həyata keçirilməsini təklif edib. Onun sözlərinə görə, söhbət əsasən neft və qaz tədarükünə məhdudiyyətlərdən gedib: “Trampın yanaşması bundan ibarətdir ki, biz sanksiyalar siyasətində birlikdə hərəkət etməli və Rusiyanın hərbi maşınını iqtisadi vasitələrlə dayandırmağın yollarını tapmalıyıq”.
Stubb əlavə edib ki, növbəti mərhələdə Avropa Komissiyasının rəhbəri Ursula fon der Lyayen və Trampın yaxın müşavirləri ilə müzakirələr keçiriləcək.
Ukrayna Prezidenti Volodimir Zelenski Makronla birgə mətbuat konfransında bildirib ki, artıq təhlükəsizlik zəmanətlərinin ümumi strukturu müəyyənləşib. Onun sözlərinə görə, hər bir ölkə öz töhfəsini vermək üçün ayrıca sənədlər hazırlayır. Zelenski vurğulayıb ki, güclü Ukrayna ordusu bu öhdəliklərin əsas dayağı olacaq və Avropa müdafiə şirkətləri fəaliyyətini daha da intensivləşdirməlidir. O həmçinin Rusiya Prezidenti Vladimir Putinin “Moskavaya dəvəti” ilə bağlı mövqeyini açıqlayıb: “Amerikalı tərəfdaşlarımız dedi ki, Putin məni Moskvaya dəvət edib. Əgər görüşün olmamasını istəyirsənsə, məni Moskvaya dəvət et. Bu, onların müharibəni bitirmək niyyətində olmadığını göstərir”.
Zelenski əlavə edib ki, zəmanətlər parlamentlər səviyyəsində ratifikasiya olunmalıdır: “Budapeşt Memorandumunun və Minsk razılaşmalarının təkrarlanmasını istəmirik və qəbul etmirik”. Onun sözlərinə görə, Avropa İttifaqına üzvlük də iqtisadi, siyasi və geosiyasi təhlükəsizlik zəmanətlərinin mühüm hissəsidir. Gözlənilir ki, Ukrayna üçün hazırlanacaq təhlükəsizlik zəmanətləri paketi diplomatik, maliyyə və hərbi elementləri özündə birləşdirəcək və ölkənin müdafiə qabiliyyətini daha da gücləndirməyə yönələcək(azpolitika.info).
