"Bu təhlükəli və psixi problemli adam..." - Məşhur senator Trampa qarşı

Donald Trampın hərəkətləri və ritorikası təkcə beynəlxalq aləmdə deyil, ABŞ-nin özündə də çoxları tərəfindən böyük ikrah hissi və qıcıqla qarşılanır.

Xarici KİV-lər xəbər verir ki, bir zaman prezidentliyə namizəd olmuş, hazırda isə ABŞ-də ən tanınmış senatorlardan olan Berni Sanders Donald Trampın İrana ünvanladığı təhqiramiz çıxışını sərt şəkildə tənqid edib.

Senator Trampın xüsusilə Pasxa bayramı qeyd edilən gün İrana ünvanladığı bəyanatı əxlaqdan və mədəniyyətdən uzaq hesab edib: "Bu, təhlükəli və psixi cəhətdən qeyri-sabit bir adamın cəfəngiyyatıdır. Konqres İNDİ hərəkətə keçməlidir. Bu müharibəyə son qoyun", - deyə Sanders X sosial media platformasında yazıb.

Xatırladaq ki, Tramp 5 apreldə “TruthSocial” sosial media platformasında İrana müraciət edərək təhqiramiz formada Hörmüz boğazının açılmasını tələb edib.

"Çərşənbə axşamı İranda Elektrik Stansiyaları Günü və Körpü Günüdür. Heç kim buna bənzər bir şey görməyib!!! O “lənətə gəlmiş boğazı”(söyüşlə yazıb-red.) açın, dəli alçaqlar, yoxsa cəhənnəmdə yaşayacaqsınız - SADƏCƏ İZLƏYİN! Allaha həmd olsun", - deyə ABŞ prezidenti yazıb.

Şənbə günü Tramp Hörmüz boğazının açılmasını tələb edərək, o 48 saat ərzində açılmazsa, İranı "cəhənnəm"lə hədələyib.

Ancaq sonradan İranla daha 2 gün “möhlət verdiyini” bəyan edib.

İran İslam İnqilabı Keşikçiləri Korpusu (SEPAH) öz növbəsində vəziyyətin daha da gərginləşəcəyi təqdirdə bölgədəki düşmənlərinə "cəhənnəm qapılarını" açacağına söz verib.